ވިލިމާލެ ޕޮލިސް ސްޓޭޝަނުގެ ބެލުމުގައި ހުރި ސިނގިރޭޓް ކާޓަންތައް ގެއްލުނު މައްސަލައިގައި ފުލުހުންގެ ސީނިއަރ ސާޖަންޓެއް ހައްޔަރުކޮށްފި އެވެ. މި މައްސަލައިގައި ހައްޔަރުކޮށްފައިވަނީ އދ. ދިގުރަށް ޝަބުނަމީގެ މުނައްވަރު އާދަމް (39އ) އެވެ.
ގަވާއިދާ ހިލާފަށް ރާއްޖެއަށް އެތެރެކުރި ކަމަށް ތުހުމަތުކޮށް މި އަހަރުގެ މެއި މަހު ބިދޭސީއަކުގެ އަތުން 32 ކާޓަން ސިނގިރޭޓް ފުލުހުން ހިފަހައްޓައިފައިވެ އެވެ. އެ ސިނގިރޭޓްތައް ކަސްޓަމްސްއާ ހަވާލުކުރަން އޮތުމުގެ ތެރޭގައި ހަ ކާޓަން މަދުވިކަން އެނގުނީ މިދިޔަ މަހުގެ 12 ވަނަ ދުވަހު ބެލުމުން ކަމަށް ފުލުހުން ބުނެ އެވެ.
މި މައްސަލައާ ގުޅިގެން މުނައްވަރު އާދަމް ސަސްޕެންޑްކޮށްފައިވާއިރު، ތަހުގީގު ކުރިއަށްދަނީ ފުލުހުންނާއި ނޭޝަނަލް އިންޓަގްރިޓީ ކޮމިޝަން ގުޅިގެން ކަމަށް ފުލުހުން ހާމަކުރެ އެވެ.
ކޮމެންޓު ފޮނުވާ