މާލޭގެ ހެންވޭރު ރައްޔިތުންނާ ރޭ ބޭއްވެވި މަޝްވަރާ ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ބޯހިޔާވަހިކަމުގެ ސްކީމްތަކަށް މުހިއްމު ބަދަލުތަކެއް ގެނައުމަށް ނިންމަވާފައިވާކަން ހާމަކުރައްވައިފައެވެ. ކަލާފާނު ސްކޫލްގައި ބޭއްވެވި މި ބައްދަލުވުމުގައި ރައްޔިތުން އެންމެ ބޮޑަށް ކަންބޮޑުވުން ފާޅުކުރެއްވީ ގެދޮރުވެރިކަމާ ހެދި ދިމާވެފައިވާ ދަތިތަކާ ގުޅޭގޮތުންނެވެ.
އެކަންކަމަށް އިޝާރާތް ކުރައްވައި ރައީސް ވިދާޅުވީ މަޖުބޫރީ ހާލަތްތަކުގައި ކުރީގެ ސްކީމްތަކަށް ކުރިމަތިލާން ޖެހި އެއް ކޮޓަރީގެ ފްލެޓް ލިބިވަޑައިގެންފައިވާ ފަރާތްތަކަށް ތިން ކޮޓަރީގެ ފްލެޓްތަކަށް ކުރިމަތިލެވޭ ގޮތަށް ސްކީމް އިޞްލާޙުކުރަން ނިންމަވާފައިވާކަމަށެވެ. އަދި ސްކީމްތަކަށް ކުރިމަތިލުމުގެ ޝަރުޠުތަކުގެ ތެރެއިން މާލެ ރައްވެއްސެއްގެ ގޮތުގައި ފަސް އަހަރު ހަމަވެފައި އޮންނަން ޖެހޭ މައްސަލައަށްވެސް ހައްލެއް ހޯއްދަވައިދެއްވާނެކަމުގެ ޔަޤީންކަން އެމަނިކުފާނު ދެއްވިއެވެ.
އެކި ސަރުކާރުތަކުން ގޯއްޗާއި ފްލެޓް ދޫކުރައްވާފައި ހުރި ގޮތާއި އެކަންކަމުގައި ނާއިންސާފަށް ކުރިމަތިލާން ޖެހިވަޑައިގެންފައިވާ ފަރާތްތަކަށް އިންސާފު ހޯއްދަވައިދެއްވަން ކުރައްވަމުން ގެންދަވާ މަސައްކަތްތަކުގެ މަޢުލޫމާތު ދެއްވައި ރައީސް ވަނީ ވަޢުދުފުޅުތައް ފުއްދަވާނެކަމުގެ ޔަޤީންކަން ރައްޔިތުންނަށް ދެއްވާފައެވެ.
ކޮމެންޓު ފޮނުވާ