ގޯތި ލިބުނު ފަރާތްތަކަށް، އެމީހުންނަށް ލިބުނު ތަނުން ގޯތި ދިނުމުގެ ވަޢުދާ އެއްވެސް ހިލާފެއް ނުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ހެންވޭރު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު ވަޢުދުވެވަޑައިގެންފައިވަނީ ލިބުނު ތަނުން ގޯތި ދިނުމަށް ކަމަށާއި، އެގޮތަށް ކަންކަން ކުރިއަށް ގެންދެވޭނެ ކަމަށެވެ.
ގޯތި ދިނުމުގެ މަސައްކަތުގައި އެންމެ ބޮޑު ބަދަލުތައް އައީ ގުޅިފަޅާއި ގިރާވަރުފަޅަށް ކަމަށް ރައީސް ވިދާޅުވިއެވެ. ކުރީ ސަރުކާރުން ގިރާވަރުފަޅުގެ ލޭންޑް ޔޫސް ޕްލޭނެއް ނުހަދާ، މަގަކަށް ނުވަތަ ސްކޫލާއި ހޮސްޕިޓަލަކަށް ތަނެއް ނުކަނޑާ ހަމައެކަނި ގޯތި ދޫކޮށްފައިވާތީ، މޫދުން ހިއްކިޔަސް ނުފުދޭހާ ގިނައިން ގޯތި ދޫކޮށްފައި ހުރި ކަމަށް އެމަނިކުފާނު ވިދާޅުވިއެވެ. މި ސަބަބަށްޓަކައި ބައެއް ފަރާތްތަކަށް ގުޅިފަޅަށް ބަދަލުވާން ޖެހުނު ކަމަށާއި، އެއީ ވަޢުދާ ޚިލާފުވުމެއް ނޫން ކަމަށް ރައީސް ވަނީ ފާހަގަކުރައްވައިފައެވެ.
ގުޅީފަޅުގެ ލޭންޑް ޔޫސް ޕްލޭނަށް ވެސް ބަދަލުތައް ގެނައީ އެތަނުން އެންމެ ބޭނުންތެރި ގޮތުގައި ބޭނުންހިފުމަށްޓަކައި ކަމަށާއި، ހިއްކާ ނިމިފައިވާ ބައިން އެންމެ އަވަހަށް ގޯއްޗަށް ވަދެވޭނެ ގޮތެއް ހެދުމަށް ކަމަށް ރައީސް ވިދާޅުވިއެވެ. އެއީ ފިޒިކަލް ލޮކޭޝަނުން ނުދިނުމެއް ނޫން ކަމަށާއި، ގުޅިފަޅުން ވެސް އެމީހާއަށް ލިބޭ ގޮތަށް އަވަހަށް ދޭންވެގެން ގެނައި ބަދަލުތަކެއް ކަމަށް އެމަނިކުފާނު ވިދާޅުވިއެވެ. ކުރީގެ ސްކީމްތަކަށް ކުރިމަތިލާންޖެހި އެއް ކޮޓަރީގެ ފްލެޓް ލިބިވަޑައިގެންފައިވާ ފަރާތްތަކަށް ތިން ކޮޓަރީގެ ފްލެޓްތަކަށް ކުރިމަތިލެވޭ ގޮތަށް ސްކީމް އިޞްލާޙުކުރައްވަން ވަނީ ނިންމަވާފައި ކަމަށާއި، މާލޭ ރައްވެއްސެއްގެ ގޮތުގައި ފަސް އަހަރު ހަމަވެފައި އޮތުމަށް އޮންނަ މައްސަލައަށް ވެސް ޙައްލެއް ހޯއްދަވައިދެއްވާނެ ކަމަށް ރައީސް ވިދާޅުވިއެވެ.
ކޮމެންޓު ފޮނުވާ