ރައްޔިތުންގެ ޕެންޝަން ފަންޑުން ފައިސާ ބޭނުންކުރެވޭނެ ޚާއްސަ ހާލަތްތައް އިތުރުކޮށް، ގިނަ ފުރުސަތުތައް ހުޅުވާލުމަށްޓަކައި ޕެންޝަނާ ބެހޭ ގާނޫނަށް އިސްލާހު ގެނައުމަށް މަސައްކަތްކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ހެންވޭރުގެ ރައްޔިތުންނާ ބައްދަލުކުރެއްވުމަށް ބޭއްވެވި ޖަލްސާއެއްގައި ވާހަކަފުޅު ދައްކަވަމުން ރައީސް ވިދާޅުވީ، ޕެންޝަން ފަންޑުގެ ބޭނުން ހިފޭނެ ކަންކަން ކޮށްދެއްވުމަކީ އެމަނިކުފާނުގެ ވައުދެއް ކަމަށާއި، މިހާރުވެސް ބައެއް ކަންކަން ފަށާފައިވާ ކަމަށެވެ. އެހެންނަމަވެސް، މި މަސައްކަތް އިތުރަށް ފުޅާކުރެއްވުމަށް ރައްޔިތުންނަށް އިތުރު ފުރުސަތުތަކެއް ދެއްވުމަށްޓަކައި ޕެންޝަނާ ބެހޭ ގާނޫނަށް އިސްލާހުތަކެއް ހުށަހަޅުއްވާނެ ކަމަށް ރައީސް ވިދާޅުވިއެވެ.
ރައީސް ފާހަގަކުރެއްވި ގޮތުގައި، މަޖިލީހުގެ ޗުއްޓީ ނިމި އަލުން ހުޅުވާ ދައުރަށް މި އިސްލާހުތައް ހުށަހަޅުއްވާނެއެވެ. މި އިސްލާހުތަކުގެ ސަބަބުން ވަރަށް ގިނަ ކަންތައްތަކަށް ރައްޔިތުންނަށް ފުރުސަތު ލިބިގެންދާނެ ކަމަށް އެމަނިކުފާނު ވިދާޅުވެފައިވެއެވެ. ނަމަވެސް، ގާނޫނަށް ގެނައުމަށް ރާވާފައިވާ އިސްލާހުތަކުގެ ތަފްސީލެއް އެމަނިކުފާނު ދެއްވާފައެއް ނުވެއެވެ.
މިހާރު ވެސް އަމިއްލަ ޕެންޝަން ފަންޑުގައި ހުންނަ ފައިސާގެ ވަކި ނިސްބަތަކަށް ބަލައި، އޭގެ ތެރެއިން ބައެއް ފަރުޟު ހައްޖު އަދާކުރުމާއި، ގޯތި ގެދޮރު ގަތުމަށް ފުރަތަމަ ފައިސާ ދެއްކުން ފަދަ ކަންކަމަށް ބޭނުންކުރެވޭނެ އިންތިޒާމު ހަމަޖެހިފައިވެއެވެ.
ކޮމެންޓު ފޮނުވާ