ވައިބާ އެކައުންޓް ހެކުކުކޮށް ހިންގި ފްރޯޑް މައްސަލައެއްގައި ދެވަނަ މީހަކު ހައްޔަރު ކޮށްފި

މީހެއްގެ ވައިބާ އެކައުންޓް ހެކުކޮށް އެމީހާގެ ނަމުގައި މަކަރާއި ހީލަތުން 150،000 ރުފިޔާއަށްވުރެ ގިނަ ފައިސާ ހޯދި މައްސަލައާ ގުޅިގެން ފުލުހުން ދެވަނަ މީހަކު ހައްޔަރުކޮށްފިއެވެ.

މީގެ ކުރިން މި މައްސަލައިގައި ހައްޔަރުކޮށްފައިވަނީ ގ. މާލޭހިޔާ 1-16-03 މާލެ، އަހްމަދު ހައްސާން 33 އެވެ. މިހާރު ހައްޔަރުކޮށްފައިވަނީ ނ. މަނަދޫ ވެށި، ހުސައިން ސަމާހް 33 އެވެ. ކޯޓު އަމުރެއްގެ ދަށުން ސަމާހް ހައްޔަރުކޮށްފައިވަނީ އިއްޔެއެވެ.

ފުލުހުން ހާމަކުރި ގޮތުގައި ސަމާހް އަމިއްލަ އެކައުންޓެއް ބޭންކުގައި ހުޅުވައި މަންފާ ހޯދުމަށް އެ އެކައުންޓް ކުއްޔަށްދީ، މަކަރާއި ހީލަތުން އެކި މީހުންގެ އަތުން ހޯދި ފައިސާގެ ތެރެއިން 75،000 ރުފިޔާ އެ އެކައުންޓަށް ޖަމާކޮށް ނެގިފައިވާކަން ފާހަގަކުރެވިފައިވެއެވެ. މި މައްސަލައާ ގުޅިގެން ކޯޓުން ވަނީ ސަމާހް 12 ދުވަހުގެ މުއްދަތަށް ބަންދުގައި ބެހެއްޓުމަށް އަމުރުކޮށްފައެވެ. މި މައްސަލަ ފުލުހުން ދަނީ ތަހުގީގު ކުރަމުންނެވެ.