ދުންފަތާއި ދުރުހެލިވުމަށް ބޭނުންވާ މީހުންނަށް އެހީ ނުލިބި ތިބެން ނުޖެހޭނެކަން ހެލްތް މިނިސްޓަރ އަބްދުﷲ ނާޒިމް އިބްރާހިމް ޔަގީންކަން ދެއްވައިފިއެވެ. މިއަދު ރައްޔިތުންގެ މަޖިލީހުގައި ޖެނެރޭޝަނަލް ބޭން ތަންފީޒުކުރުމާ ގުޅޭގޮތުން ވާހަކަ ދައްކަވަމުން މިނިސްޓަރު ވިދާޅުވީ، ގައިން ގަޔަށް ނާރާ ބަލިތަކަށް ހައްލު ހޯދުމަކީ ވަރަށް މުހިންމު ކަމެއްކަމަށާއި، މި މަސައްކަތުގައި ދުންފަތުން ދުރުހެލިވުމަކީ އެންމެ މުހިންމު ކަމެއްކަމަށެވެ.
މިނިސްޓަރު ވިދާޅުވީ، ދުންފަތުން ދުރުހެލިވުމަކީ މީހާގެ ބިހޭވިއާއާއި ދިރިއުޅުމުގެ ވައްޓަފާޅިއާއި ގުޅޭކަމެއްކަމަށާއި، މިކަން ހައްލުކުރުމަށް ދިރާސާތަކުން ދައްކާ ގޮތުން ތިން ކަމަކަށް އެޑްރެސް ކުރަން ޖެހޭކަމަށެވެ. އެގޮތުން ސަރުކާރުން ކަމާއި ގުޅުން ހުރި މައުލޫމާތު ފޯރުކޮށްދެމުން ދާނެކަމަށާއި، ބޭނުންވާ އަމަލީ ހުނަރު އަށަގަތުމަށް އެހީތެރިވެދޭނެކަމަށް ނާޒިމް ވިދާޅުވިއެވެ. އަދި މި މަސައްކަތުގައި ސޯޝަލް މީޑިއާ ބޭނުންކޮށްގެން މުޅި ގައުމު ބައިވެރިކޮށްގެން ކުރިއަށްދާނެކަމަށްވެސް މިނިސްޓަރު ވިދާޅުވިއެވެ.
ސަރުކާރުން އަތޮޅުތެރޭގެ ހުރިހާ ރަށެއްގައި ސިޒޭޝަން ކްލިނިކްތަކުގެ ހިދުމަތް ދޭން ފަށާފައިވާކަމަށާއި، މިކަމަށް ބޭނުންވާ ބޭސް ފޯރުކޮށްދިނުމުގެ މަސައްކަތްވެސް ކުރަމުންދާކަމަށް ނާޒިމް ވިދާޅުވިއެވެ. މިހިދުމަތްތައް އާސަންދައިގެ ތެރެއިން ހިލޭ ލިބޭނެކަމަށާއި، ކުއްލިއަކަށް އެހީ ބޭނުންވެއްޖެނަމަ ހެލްޕްލައިނެއްވެސް ގާއިމްކޮށްފައިވާކަން މިނިސްޓަރު ފާހަގަކުރެއްވިއެވެ.
ކޮމެންޓު ފޮނުވާ