ދުނިޔޭގެ އެންމެ ބޮޑު ޓެކްނޮލޮޖީ ކުންފުނިތަކުގެ ތެރެއިން ގޫގުލްއިން ދިވެހިރާއްޖޭގައި އިންޓަރނޭޝަނަލް ސަބްމެރިން ކޭބަލް ލޭންޑިންގ ސްޓޭޝަންއެއް ޤާއިމުކުރުމަށް ނިންމުމާ ގުޅިގެން ދިވެހި ސަރުކާރުން މި ނިންމުމަށް ހޫނު މަރުޙަބާއެއް ކިޔައިފިއެވެ.
އައްޑޫ ސިޓީގެ ހިތަދޫގައި ގާއިމުކުރާ މި ފެސިލިޓީއަކީ ރައީސް ޑރ. މުޙައްމަދު މުޢިއްޒު މި އަހަރުގެ ސެޕްޓެންބަރު މަހު އެމެރިކާގެ ނިއުޔޯކަށް ކުރެއްވި ދަތުރުފުޅުގައި ގޫގުލްގެ އިސްވެރިންނާ ބައްދަލުކުރެއްވުމަށްފަހު ކުރިއަށް ގެންދިއުމަށް ނިންމި ތާރީޚީ މަޝްރޫޢެކެވެ. މި ސްޓޭޝަންއާއެކު ދިވެހިރާއްޖެ ވަނީ އޭޝިއާ، އޯޝޭނިއާ، އެފްރިކާ، މެދުއިރުމަތީ އަދި ޔޫރަޕު ގުޅުވައިދޭ ވިލިޒަށް ޑިޖިޓަލް ގޭޓްވޭއަކަށް ވެގެންދާނެއެވެ.
މާލެއާއި ހުޅުމާލޭގައި މިހާރު ހުރި ކަނެކްޓިވިޓީ ޕޮއިންޓްތަކުގެ އިތުރުން އައްޑޫގައި މި ފެސިލިޓީ ޤާއިމުވުމުން، ރާއްޖެއަށް އިންޑިއާ ކަނޑުގެ މުވާޞަލާތީ މައި މަރުކަޒަކަށް ވެގެންދާނެއެވެ. މި މަޝްރޫޢު ކުރިއަށް ގެންދިއުމަށް ވަނީ ދިރާގާއާއި އުރީދޫ މޯލްޑިވްސް ބައިވެރިވުމަށް ހަމަޖެހިފައެވެ.
މި އިންވެސްޓްމަންޓަކީ ބައިނަލްއަޤްވާމީ ބޮޑެތި އިންވެސްޓަރުން ރާއްޖެއަށް އިތުބާރުކުރާ މިންވަރު ދައްކުވައިދޭ އަދި ކްލައުޑް ސަރވިސަސް، ފިންޓެކް، ޑިޖިޓަލް ކޮންޓެންޓް އަދި ޓެކްނޮލޮޖީ ސްޓާރޓް-އަޕްސް ފަދަ ދާއިރާތައް ތަރައްޤީކުރުމުގެ ފުރުޞަތު ހުޅުވައިދޭ މުހިންމު ބުރަހަކަށްވާނެއެވެ. ފަތުރުވެރިކަމުން ބޭރުން ރާއްޖޭގެ އިޤްތިޞާދު ސިންދަފާތުކޮށް ވަޒީފާގެ ފުރުޞަތުތައް އިތުރުކުރުމަށް ސަރުކާރުން ކުރައްވާ މަސައްކަތުގައި މި މަޝްރޫޢުން ވަރަށް ބޮޑު ދައުރެއް އަދާކުރާނެއެވެ.
ކޮމެންޓު ފޮނުވާ