ބަލިމީހުން ބަދަލުކުރުމުގައި ދިމާވެފައިވާ ދަތިތަކަށް ހައްލު ގެނައުމުގެ ގޮތުން އަންނަ އަހަރުގެ ޖެނުއަރީ މަހު 10 އިތުރު ސީ އެމްބިއުލާންސް ހިދުމަތަށް ނެރުމަށް ސަރުކާރުން ނިންމައިފިއެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިކަން އިއުލާންކުރެއްވީ ސަރުކާރަށް 2 އަހަރު ފުރުމުގެ މުނާސަބަތުގައި މިރޭ ބޭއްވި ޖަލްސާގައި ވާހަކަދައްކަވަމުންނެވެ.
ރައީސް ވިދާޅުވީ ސަރުކާރާ ހަވާލުވިއިރު ރާއްޖޭގެ ސީ އެމްބިއުލާންސްގެ ހިދުމަތް އޮތީ ވަރަށް ދަށް ފެންވަރެއްގައި ކަމަށާއި އެހިދުމަތް ރަނގަޅުކުރުމަށް ގިނަ މަސައްކަތްތަކެއް ސަރުކާރުން ކުރަމުންދާ ކަމަށެވެ. ޖެނުއަރީގައި އިތުރުވާ 10 ސީ އެމްބިއުލާންސްތަކާއިއެކު 7 އިތުރު ރަށެއްގައި މިހިދުމަތް ފެށިގެންދާނެއެވެ. މި ހިދުމަތް އެންމެ ފުރަތަމަ ފެށިގެންދާނީ ރައީސް އިންތިހާބީ ވައުދުގައި ސީ އެމްބިއުލާންސް ފައްޓަވައިދެއްވާނެ ކަމަށް ވިދާޅުވި ރަށްތަކުގައި ކަމަށް ރައީސް ވިދާޅުވިއެވެ.
އަންނަ އަހަރުގެ ތެރޭގައި އިތުރު ރަށްރަށަށް މި ހިދުމަތް ފުޅާކުރެވިގެންދާނެ ކަމަށާއި 32 ސީ އެމްބިއުލާންސް ސްޓޭޝަން ގާއިމްކުރުމަށް ނިންމާފައިވާކަންވެސް ސަރުކާރުން މިރޭ ހާމަކުރެއްވިއެވެ.
ކޮމެންޓު ފޮނުވާ