ރާއްޖޭގެ ބޯހިޔާވަހިކަމުގެ މައްސަލައަށް ހައްލު ހޯދުމުގެ ގޮތުން ސަރުކާރުން، "އެންމެނަށް ބޯހިޔާވަހިކަން" ސިޔާސަތު އިފްތިތާހުކޮށް މާލެއާ ރަސްމާލެއިން 7500 ފްލެޓާއި 15000 ގޯތި ދޫކުރުމަށް ގެޒެޓުގައި އިއުލާންކޮށްފިއެވެ. ކޮންސްޓްރަކްޝަން މިނިސްޓަރު ޑރ. އަބްދުﷲ މުއްޠަލިބު މި ސިޔާސަތު އިފްތިތާހުކުރެއްވީ ރޭގައެވެ.
އާންމުކުރި އުސޫލުގައިވާ ގޮތުން މި 7500 ފްލެޓުގެ ތެރެއިން ފުލުހުންނަށް 100 ފްލެޓާއި ސިފައިންނަށް 100 ފްލެޓު ޚާއްސަކޮށްފައިވެއެވެ. މީގެ އިތުރުން ސިވިލް ސާވިސް މުވައްޒަފުންނަށް 200 ފްލެޓާއި ދައުލަތުގެ 25 މުއައްސަސާއަކަށް 300 ފްލެޓު ދޫކުރުމަށް ހަމަޖައްސާފައިވެއެވެ.
ޚާއްސަ އިސްކަންދޭ ކެޓަގަރީތަކުގެ ތެރޭގައި އެކަނިވެރި މައިންނާ ބަފައިން، ނުކުޅެދުންތެރިން، އަލަތު ކައިވެނިކުރާ ފަރާތްތަކާއި ޓެކްސީ ޑްރައިވަރުން، ޓޫރިޒަމް ސިނާއަތުގައި މަސައްކަތްކުރާ މުވައްޒަފުން، ޖުޑިޝަރީ މުވައްޒަފުން، މަސްވެރިން އަދި ފަގީރު އާއިލާތައް ހިމެނެއެވެ. އަދި މައިމުޅަވުމުގެ ސަބަބުން ގެދޮރު މިލްކުކުރުމުން މަހްރޫމްވި ފަރާތްތަކަށް ވެސް ފްލެޓްތައް ޚާއްސަކޮށްފައިވެއެވެ.
މި ސްކީމަށް ހުށަހެޅުމުގެ ފުރުޞަތު އަންނަ އަހަރުގެ ޖަނަވަރީ 4 އިން މާރިޗު 3 ށް ހިޔާވެހި ޕޯޓަލް މެދުވެރިކޮށް ހުޅުވާލެވޭނެއެވެ. މާލެ ރަށްވެހިންނަށް 4000 ފްލެޓު ކަނޑައަޅާފައިވާއިރު އެދެވޭނީ ފަސް އަހަރަށް ވުރެ ގިނަ ދުވަސް މާލޭގައި ދިރިއުޅެމުންދާ މީހުންނަށެވެ. މި ސިޔާސަތުގެ ދަށުން ރައީސް ވަނީ ކުރިއަށް އޮތް ފަސް މަސް ތެރޭ ރަސްމާލެއިން މާލެ ރަށްވެހިންނަށް ޚާއްސަ 700 ހައުސިން ޔުނިޓު އެޅުމުގެ މަސައްކަތް ފެށުމަށް ނިންމަވާފައިވާކަމަށް ވެސް ވިދާޅުވެފައެވެ.
ކޮމެންޓު ފޮނުވާ