ކައުންސިލަރުންގެ އަދަދު މަދުކުރަން ގާނޫނު އިސްލާހުކުރަން މަޖިލީހަށް ހުށަހަޅައިފި

ލާމަރުކަޒީ ނިޒާމު އިތުރަށް ފައިދާހުރި ގޮތަކަށް ހެދުމަށް ކައުންސިލަރުންގެ އަދަދު މަދުކުރުމަށް ސަރުކާރުން މިއަދު މަޖިލީހަށް ހުށަހެޅި ގާނޫނުގެ އިސްލާހުން، ސިޓީ ކައުންސިލްތަކުގެ މެންބަރުންގެ އަދަދަށް ބޮޑެތި ބަދަލުތައް ގެނެސްދޭނެ އެވެ.

ޕީއެންސީގެ ޕާލިމަންޓްރީ ގްރޫޕް ލީޑަރު އިބްރާހިމް ފަލާހު މަޖިލީހަށް ހުށަހެޅުއްވި މި އިސްލާހުގައި، މާލެ ސިޓީ ކައުންސިލްގެ މެންބަރުންގެ އަދަދު 19އިން 16އަށް ތިރިކުރުމަށް ހިމަނާފައިވެ އެވެ. އެގޮތުން މާލެ ކައުންސިލްގައި މެންބަރުން ތިބޭނީ މަޖިލީހުގައި މާލެ ތަމްސީލުކުރާ ދާއިރާތަކުގެ އަދަދަށެވެ. މާލޭގެ ރަޖިސްޓްރީ އާބާދީއަކީ 83،800 އެއްހާ މީހުންނެވެ.

ފުވައްމުލަކަށް ވަކި ގޮތެއް ހެދުމަށް ހުށަހަޅާފައިވާއިރު، އެ ސިޓީގައި ތިބޭ ހަތް ކައުންސިލަރުންގެ އަދަދު ނުވައަށް އިތުރުކުރުމަށް ހިމަނާފައިވެ އެވެ. މީގެ ސަބަބެއް ކަމަށް ބުނާގޮތުގައި ފުވައްމުލަކަކީ އަށް އަވަށެއްގެ މައްޗަށް އެކުލެވިގެންވާ އިދާރީ ދާއިރާއަކަށްވާތީ، ކޮންމެ އަވަށަކަށް ކައުންސިލަރަކު އިންތިހާބުކުރުމަށް ހުށަހަޅާފައިވެ އެވެ. ފުވައްމުލަކުގެ ރަޖިސްޓްރީ އާބާދީއަކީ 13،800 މީހުންނަމަވެސް، އެ ރަށުގައި ދިރިއުޅެނީ 9،000 އެއްހާ މީހުންނެވެ.

އެންމެ ބޮޑު ބަދަލު އަންނަނީ އައްޑޫ ސިޓީއަށެވެ. މި އަހަރު ނެގި ވޯޓުން ހުޅުދޫ އަދި މީދޫ އައްޑޫ ސިޓީން ވަކިވެފައިވާތީ، އައްޑޫގެ ރަޖިސްޓްރީ އާބާދީއަކީ އެ ދެ ރަށް ނުލައި 28،800 މީހުންނެވެ. އެހެންވެ މިހާރު ތިބޭ 13 ކައުންސިލަރުންގެ ބަދަލުގައި، އައްޑޫ ސިޓީ ކައުންސިލްގައި ދެން ތިބޭނީ ހަތް ކައުންސިލަރުންނެވެ. ނަމަވެސް ހުޅުދޫ އަދި މީދޫގައި ކޮންމެ ރަށެއްގައި ފަސް ކައުންސިލަރުން އިންތިހާބުކުރާތީ، މުޅި އަތޮޅުގައި ދެން ތިބޭނީ 17 ކައުންސިލަރުންނެވެ. މިއީ މިހާރު އޮތް އަދަދަށްވުރެ ހަތަރު ކައުންސިލަރުން އިތުރުވާ ގޮތެކެވެ.

11،000 އާބާދީއެއް ތިބި ކުޅުދުއްފުށި އަދި 10،450 އާބާދީއެއް ތިބި ތިނަދޫގައި ވެސް އައްޑޫގެ ފަދައިން ހަތް ކައުންސިލަރުން ތިބޭނެ އެވެ. މާޗް މަހު ކައުންސިލް އިންތިހާބު ބާއްވަން އިލެކްޝަންސް ކޮމިޝަނުން ނިންމާފައިވާއިރު، މި އިސްލާހު ފާސްވުމާއެކު އެ އިންތިހާބުގައި އިންތިހާބުކުރާ ކައުންސިލަރުންގެ އަދަދު މަދުވާނެ އެވެ.