ޝަރުޢީ ދާއިރާއަށް މިސަރުކާރުން އެއްވެސް ނުފޫޒެއް ނުފޯރުވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. ޕީއެންސީގެ ރޭގެ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، ސަރުކާރަށް ދެ އަހަރު ފުރިގެންދާއިރު ޝަރުޢީ ދާއިރާ ހިންގާފައިވަނީ ފުރިހަމަ މިނިވަންކަމާއެކު ކަމަށެވެ.
ވަކި ގޮތަކަށް ޝަރީޢަތް ކުރިޔަށް ގެންދިއުމަށް އިރުޝާދު ދިންކަމަށް އެއްވެސް ފަނޑިޔާރަކަށް ނުބުނެވޭނެކަމަށް ރައީސް ފާހަގަކުރެއްވިއެވެ. އަދި ޑްރަގް ގްރޫޕްތަކުން، ގޭންގުތަކުން ނުވަތަ ސިޔާސީ ފަރާތްތަކުން ކުރިމަތި ކުރުވާ ނުފޫޒަކަށް ފަނޑިޔާރުން ލެނބިގެންނުވާނެކަމަށްވެސް ވިދާޅުވިއެވެ.
ޝަރުޢީ ދާއިރާއަށް ވަކި ބަޖެޓެއް ހަދައިދީ، އެމްއެމްއޭގައި ވަކި އެކައުންޓެއް ހުޅުވައި، މުވައްޒަފުން ނެގުމާއި މަރާމާތުތަކާއި ދަތުރުތައް ފަދަ ހުރިހާ ކަމެއް އަމިއްލައަށް ނިންމުމުގެ މިނިވަންކަން ދީފައިވާކަމަށް ރައީސް ވިދާޅުވިއެވެ. މިއަހަރު ޝަރުޢީ ދާއިރާއަށް ކުރިން ނުދޭހާ ބޮޑު ބަޖެޓެއް ހަމަޖައްސައިދީފައިވާކަމަށްވެސް ފާހަގަކުރެއްވިއެވެ.
ކްރިމިނަލް ކޯޓާއި ޑްރަގް ކޯޓު ހުޅުމާލޭގައި ހަދައި ނިންމާފައިވާކަމަށާއި، ކުރިން ފުނިޖެހިފައި ހުރި މައްސަލަތައް މިހާރު ފަނޑިޔާރުންގެ ފުރިހަމަ މިނިވަންކަމުގައި ބެލަމުންދާކަމަށް ރައީސް ވިދާޅުވިއެވެ. ރައްޔިތުން އެދިވަޑައިގަތް މިނިވަން ޝަރުޢީ ނިޒާމެއް ޤާއިމުކޮށް، އިންސާފުވެރިކަމާއެކު ޤައުމު ކުރިޔަށް ގެންދެވޭނެކަމުގެ ޔަޤީންކަން ރައީސް ދެއްވިއެވެ.
ކޮމެންޓު ފޮނުވާ