ފަލަސްޠީނުގެ މިނިވަން ދުވަހުގެ މުނާސަބާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެ ޤައުމުގެ ފުރިހަމަ މިނިވަންކަމަށް ދިވެހިރާއްޖެއިން އަބަދުވެސް ވަކާލާތުކުރާނެކަމަށް ވިދާޅުވެފައެވެ.
މީސް މީޑިޔާގައި ޙިއްސާކުރެއްވި ޕޯސްޓެއްގައި ރައީސް ވިދާޅުވީ، 1967 ވަނަ އަހަރުގެ ބޯޑަރުތަކާ އެއްގޮތަށް އިރުމަތީ ޤުދުސް ވެރިރަށްކޮށްގެން މިނިވަން ފަލަސްޠީން ދައުލަތެއް ޤާއިމުކުރުމަށް ބައިނަލްއަޤުވާމީ މުޖުތަމަޢަށް ގޮވާލާކަމަށެވެ. އަދި ފަލަސްޠީނުގެ މުސްލިމް އަޚުންނާއި އުޚްތުންނާއެކު ދިވެހި ސަރުކާރާއި ރައްޔިތުން ސާބިތުކަމާއެކު ދެމިތިބޭނެކަމަށް ރައީސް ވިދާޅުވިއެވެ.
ފަލަސްޠީންގެ ރައީސް ޑރ. މަޙްމޫދު ޢައްބާސަށާއި ބޮޑުވަޒީރު މުޙައްމަދު މުޞްޠަފާއަށް މިނިވަން ދުވަހުގެ ތަހުނިޔާ ދަންނަވައި، ރައީސް މުއިއްޒު ވަނީ ފަލަސްޠީންގެ ރައްޔިތުންނަށް ސާބިތުކަން ދެއްވުން އެދި ދުޢާ ދަންނެވާފައެވެ.
1988 ވަނަ އަހަރުގެ ނޮވެންބަރު 15 ގައި ފަލަސްޠީންގެ މިނިވަންކަން އިޢުލާންކުރި ނަމަވެސް، އެ ޤައުމުގެ ރައްޔިތުންނާ ދެކޮޅަށް ޔަހޫދީން ދަނީ ޤަތުލުޢާންމުތައް ހިންގަމުންނެވެ. 2023 އޮކްޓޫބަރު 7 ން ފެށިގެން މިހާތަނަށް 65،000 އަށްވުރެ ގިނަ ފަލަސްޠީނުގެ ރައްޔިތުން ޝަހީދުކޮށް، 158،000އަށްވުރެ ގިނަ މީހުން ޒަޚަމުކޮށްފައިވާކަމަށް ރިޕޯޓްތަކުން ދައްކައެވެ.
ކޮމެންޓު ފޮނުވާ