ދުންފަތުގެ ވަބާއިން ދިވެހިން ސަލާމަތް ކުރުމަކީ ދުޅަހެޔޮ ޖީލަކާ ދިމާލަށް ކުރާ ދަތުރު ކާމިޔާބު ކުރުމަށް ހާސިލް ކުރަންޖެހޭ މުހިއްމު ލަނޑުދަނޑިއެއް ކަމަށް ސިއްހީ ވަޒީރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
ދުންފަތާ ދެކޮޅަށް ރާއްޖޭން ޖެނެރޭޝަން ބޭން ތަންފީޒުކުރަން ފެށުން ފާހަގަކުރުމަށް ބޭއްވި ނޭޝަނަލް ޓޯޗް ރަން ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ނާޒިމް ފާހަގަކުރެއްވީ، މި އަހަރުގެ މެއި 21 ގައި ރައީސް މުއިއްޒު ޖެނެރޭޝަން ބޭންގެ ގާނޫނު ތަންފީޒު ކުރެއްވުމުން ރާއްޖެ މިފަދަ ސިޔާސަތެއް ދުނިޔޭގައި ތަންފީޒު ކުރާ ފުރަތަމަ ގައުމަށް ވެގެން ގޮސްފައިވާ ކަމަށެވެ. މި ތާރީހީ ނިންމެވުމަށް ދުނިޔޭގެ ސިއްހީ އިދާރާތަކާއި ގައުމުތަކުން ރައީސާއި ސަރުކާރަށް ތައުރީފު އަދާކޮށްފައިވާ ކަމަށްވެސް ވަޒީރު ވިދާޅުވިއެވެ.
ރައީސުލްޖުމްހޫރިއްޔާގެ އިސްނެންގެވުމުގެ މަތިން މިއަދު ފެށިގެން މިދާ ޖެނެރޭޝަނަލް ބޭނާއި އެކު 2007 ވަނަ އަހަރުގެ ޖެނުއަރީ 1 ގައި ނުވަތަ އޭގެ ފަހުން އުފަންވާ ހުރިހާ ކުދިންނަށް ދުންފަތުގެ ރައްކާތެރިކަން ލިބިގެން ތިބެ ހެދިބޮޑުވުމުގެ ދުޅަހެޔޮ ފުރުސަތު ހޯދައިދެވިގެން މިދާ ކަމަށް ވަޒީރު ވިދާޅުވިއެވެ. ދުޅަހެޔޮ ސިއްހަތަކީ އިންސާނަކަށް ލިބޭނެ އެންމެ އަގުހުރި ނިއުމަތް ކަމަށާއި، މި ސަރުކާރުގެ ސިއްހީ ދާއިރާގެ ސިޔާސަތުތައް ބިނާވެގެން ވަނީ ދުޅަހެޔޮ ފަރުދެއް، ދުޅަހެޔޮ އާއިލާއެއް، ދުޅަހެޔޮ މުޖުތަމައުއެއް އަދި ދުޅަހެޔޮ ދިވެހީންގެ ރާއްޖެއެއް ބިނާކުރުމުގެ މައްޗަށް ކަމަށް ވަޒީރު ނާޒިމް ފާހަގަކުރެއްވިއެވެ.
ކޮމެންޓު ފޮނުވާ