މީޑިއާތަކަށް ފައިސާގެ ގްރާންޓް ދިނުން އިންސާފުވެރިކޮށް ކުރިޔަަށް ގެންދިއުމަށް ރައީސް އަންގަވައިފި

ރަޖިސްޓްރީކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން ދޭ މާލީ އެހީތެރިކަން އިންސާފުވެރި ގޮތެއްގައި ކުރިޔަށް ގެންދިއުމަށް ރައީސް ޑރ. މުހައްމަދު މުއިއްޒު ޔޫތު މިނިސްޓްރީއަށް އަންގަވައިދެއްވައިފިއެވެ. މި އަހަރުގެ ދައުލަތުގެ ބަޖެޓުގައި މީޑިއާތަކަށް ފައިސާ ދިނުމަށް ބަޖެޓުގެ އަންދާޒާކުރެވޭ އާމްދަނީގެ އެއް ޕަސެންޓް ކަނޑައަޅާފައިވާއިރު، ރައީސް މިގޮތަށް އިރުޝާދު ދެއްވީ ބައެއް މީޑިއާތަކުން މިކަމާ ގުޅިގެން ފާޅުކުރި ކަންބޮޑުވުންތަކަށް ރިއާޔަތް ކުރައްވާކަމަށް އެނގިފައި ވެއެވެ.

ޔޫތު މިނިސްޓްރީން އިއްޔެ އިއުލާންކުރި ގޮތުގައި މި އުސޫލުގެ ދަށުން 18 މީޑިއާއަކަށް ޖުމްލަ 27.9 މިލިއަން ރުފިޔާ ދޫކުރުމަށް ކަނޑައަޅާފައިވެއެވެ. މި ލިސްޓުގައި ހިމެނޭ ބައެއް މީޑިއާތަކަކީ ގަވައިދުން ހިންގަމުން ނުދާ މީޑިއާތަކެއް ކަމަށް ފާހަގަކުރެވިފައިވެއެވެ. މި ލިސްޓުން އެންމެ ގިނަ ފައިސާ ލިބެނީ ސަންގު މީޑިއާ ގްރޫޕަށް ކަމަށްވާއިރު، ސަންގު ޓީވީއާއި ސަންގު އޮންލައިނަށް ޖުމްލަ 5.1 މިލިއަން ރުފިޔާ ލިބޭނެއެވެ. ދެވަނައަށް އެންމެ ގިނަ ފައިސާ ލިބެނީ ސަން މީޑިއާ ގްރޫޕަށް ކަމަށްވާއިރު، އެތަނަށް 4.2 މިލިއަން ރުފިޔާ ލިބޭނެއެވެ. ތިން ވަނައަށް އެންމެ ގިނަ ފައިސާ ލިބެނީ ވީޓީވީއަށް ކަމަށްވާއިރު، ވީޓީވީއާއި ވީނިއުސްއަށް ޖުމްލަ 4.1 މިލިއަން ރުފިޔާ ލިބޭނެއެވެ. މި އުސޫލުގެ ދަށުން ފައިސާ ދެނީ ވަކި ޝަރުތުތަކެއް ހަމަވާ އަދި ވަކި މިންވަރަކަށް ޕޮއިންޓް ލިބޭ މީޑިއާތަކަށް އެކަންޏެވެ.