ވެލާނާ އިންޓަނޭޝަނަލް އެއާޕޯޓުން ބޭންކް އޮފް މޯލްޑިވްސްގެ ފައިސާގެ ބްރިފްކޭސެއް ފޭރުނު މައްސަލައިގައި ހައްޔަރުކުރި ހަތަރު މީހުންގެ ބަންދަށް ފަސް ދުވަސް ކޯޓުން އަމުރުކޮށްފި އެވެ.
އިއްޔެ ރޭ ފަތިހު 4:45 ހާއިރު މޫނު ނިވާކޮށްގެން ތިބި ބަޔަކު ބާ ޓާމިނަލާއި އާ ޓާމިނަލް ގުޅުވައިދޭ ވޯކްވޭގެ ތެރެއިން ވަޅިން ބިރުދައްކައިގެން ބްރިފްކޭސް ހިފައިގެން ދިޔައީ ލޯންޗެއްގަ އެވެ. އިތުބާރު ހުރި މަސްދަރުތަކުން ހާމަކުރި ގޮތުގައި، ބްރިފްކޭހުގައި ހުރީ ރާއްޖެއިން ބޭރަށް ފުރާ މީހުންނަށް ދޫކުރަން ބީއެމްއެލްއިން ގެންދިޔަ ލައްކައަކަށްވުރެ ގިނަ ޑޮލަރެވެ. ފުލުހުން ބުނެފައިވާ ގޮތުގައި، އެ ފައިސާ އުފުލުމުގައި ފުލުހުންގެ ސެކިއުރިޓީ ބޭނުން ކޮށްފައެއް ނުވެ އެވެ.
ހޯމްލޭންޑް ސެކިއުރިޓީ މިނިސްޓަރު އަލީ އިހުސާން 'އެކްސް’ގައި ހާމަކުރައްވާފައިވާ ގޮތުގައި، ކުށް ކުރުމަށް ބޭނުންކުރި ލޯންޗު ހޯދުމަށްފަހު ތުހުމަތު ކުރެވޭ ހަތަރު މީހުން ކ. ހުރާއިން ހައްޔަރުކޮށްފައިވެ އެވެ. އެ ރަށު ކޯޓުން މިއަދު އެ މީހުންގެ ބަންދަށް ފަސް ދުވަސް ޖަހައިފައިވާއިރު، އެ މީހުންގެ ވަނަވަރު ފުލުހުން އަދި ހާމައެއް ނުކުރެ އެވެ.
ކޮމެންޓު ފޮނުވާ