އިންޓަނޭޝަނަލް ފެޑެރޭޝަން އޮފް އެސޯސިއޭޝަން ފުޓްބޯލް (ފީފާ) ގެ ރައީސް ޖިއަނީ އިންފަންޓީނޯ މިއަދު ރައީސް ޑރ. މުހައްމަދު މުއިއްޒާއި ރައީސް އޮފީހުގައި ބައްދަލުކުރައްވައިފި އެވެ.
މި ބައްދަލުކުރެއްވުމުގައި ރައީސް މުއިއްޒު ވަނީ ފީފާގެ ރައީސް ރާއްޖެއަށް ވަޑައިގެންނެވުމުން ހޫނު މަރުހަބާއެއް ދަންނަވާ، ވަގުތު ހުސްކުރައްވައިގެން ރާއްޖެއަށް ވަޑައިގަތުމަށް ޝުކުރު އަދާކުރައްވާފަ އެވެ. އެމަނިކުފާނު ވަނީ ސަރުކާރުން ފުޓްބޯޅަ ތަރައްގީކުރުމަށް ހާއްސަ އަހައްމިއްޔަތެއް ދެއްވާކަމާއި، ފުޓްބޯޅަ އަކީ ދިވެހިންގެ އެންމެ މަގުބޫލު ކުޅިވަރުކަމަށް ފާހަގަކުރައްވާފަ އެވެ. މީގެ އިތުރުން ދިވެހި ރައްޔިތުންގެ މެދުގައި އެއްބައިވަންތަކަން ބަދަހިކުރުމުގައި ފުޓްބޯޅައިގެ ދައުރު ވަރަށް މުހިންމުކަން ވެސް ފާހަގަކުރެއްވި އެވެ. އެގޮތުން ރާއްޖޭގެ އެކި ސަރަހައްދުތަކުގައި މިއަހަރާއި އަންނަ އަހަރު ކުޅިވަރުގެ ދާއިރާގައި ކުރައްވަމުން ގެންދަވާ ތަރައްގީގެ މަޝްރޫއުތަކުގެ މައުލޫމާތު ހިއްސާކުރައްވާ، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ފުރިހަމަ އެއްބާރުލުން ދެއްވާނެކަން ވެސް ވިދާޅުވި އެވެ.
އިންފަންޓީނޯ ވިދާޅުވެފައިވަނީ، ދުވަސްކޮޅެއްގެ ތެރޭގައި ރާއްޖޭގެ ފުޓްބޯޅައަށް ގޮންޖެހުންތަކެއް ކުރިމަތިވެފައިވިޔަސް، މިހާރު ފެންނަމުންދާ ކުރިއެރުމަކީ ހިތްހަމަޖެހޭ ކަމެއް ކަމަށާއި، އެފްއޭއެމްގެ މިހާރުގެ އިސްވެރިންގެ މަސައްކަތަށް ތައުރީފުކުރައްވާ، ފީފާއިން ދެމުންދާ އެއްބާރުލުން އަބަދުވެސް ދެމިއޮންނާނެކަމުގެ ޔަގީންކަން ދެއްވާފައިވާ ކަމަށެވެ.
މި ޒިޔާރަތާ ގުޅިގެން އެފްއޭއެމް ކިޑްސް ފުޓްބޯލް ފެސްޓިވަލްގައި ބޭއްވި ހާއްސަ އެގްޒިބިޝަން މެޗެއްގައި ރައީސް މުއިއްޒާއި އިންފަންޓީނޯ ވަނީ ބައިވެރިވެވަޑައިގެންފަ އެވެ. ރައީސްގެ ޓީމުގައި ނައިބު ރައީސް ހުސައިން މުހައްމަދު ލަތީފާއި ސަރުކާރުގެ އިސް ބޭފުޅުން ހިމެނިވަޑައިގަތުމާ، ފީފާގެ ރައީސްގެ ޓީމުގައި އިޓަލީގެ ކުރީގެ ފުޓުބޯޅަ ތަރި މާކޯ މަޓަރާޒީގެ އިތުރުން ދިވެހި ފުޓުބޯޅައިގެ ލެޖެންޑުން ހިމެނިވަޑައިގެން ކުޅުނު މި މެޗު ކާމިޔާބުކުރީ އިންފަންޓީނޯގެ ޓީމުން 6-4 ގެ ނަތީޖާއަކުންނެވެ.
ކޮމެންޓު ފޮނުވާ