ގައުމީ ސަލާމަތާ ގުޅޭ ކަމެއްގައި މިދިޔަ ރޯދަ މަހު ސިފައިންނާއި ފުލުހުން ގުޅިގެން މާލެ ސަރަހައްދުގައި ހިންގި ކުއްލި އޮޕަރޭޝަނުގައި ހައްޔަރުކުރި ތިން މީހުންގެ މައްޗަށް ޕްރޮސިކިއުޓާ ޖެނެރަލްގެ އޮފީހުން ދައުވާކޮށްފިއެވެ. ފުލުހުންނަށް ލިބުނު އިންޓެލިޖެންސް މައުލޫމާތަކީ މާލެ އާއި މާލެ ކައިރި ރަށަކަށް ޓެރަރިޒަމްގެ ހަމަލާއެއް ދޭން ރޭވި ކަމުގެ މައުލޫމާތު ކަމަށް ޕީޖީ އޮފީހުން ބުނެފައިވެއެވެ.
ހައްޔަރުކުރި ތިން މީހުންނަކީ އަބްދުﷲ ހުވައިރިސް ބިން މުހައްމަދު، ސައުސަން ރަޝީދު އަދި އިބްރާހީމް ވިސާމެވެ. އެ ތިން މީހުންނަކީ ޓެރަރިސްޓް ޖަމާއަތެއް ކަމަށްވާ އިސްލާމިކް ސްޓޭޓަށް ތާއީދުކުރާ ބަޔެއް ކަމަށް ދައުވާގައި ބުނެފައިވެއެވެ. ހުވައިރިސްގެ މައްޗަށް ޓެރަރިޒަމްގެ އަމަލެއް ކުރުމަށް ރޭވުމާއި، ޓެރަރިސްޓު ޖަމާއަތަކަށް ތާއީދުކުރާ ލިޔުންތައް ގެންގުޅުމާއި، ހަނގުރާމައަށް މީހަކު ފޮނުވުމަށް މަސައްކަތްކުރުމުގެ ތިން ދައުވާއެއް ކޮށްފައިވެއެވެ. ސައުސަންގެ މައްޗަށް ހަނގުރާމައަށް ދާން އުޅުމުގެ ދައުވާއާއި، ޓެރަރިސްޓު ޖަމާއަތަކަށް ތާއީދުކުރާ ލިޔުންތައް ގެންގުޅުމުގެ ދެ ދައުވާއެއް ކޮށްފައިވާއިރު، ވިސާމްގެ މައްޗަށް ޓެރަރިސްޓު ޖަމާއަތަކަށް ތާއީދުކުރާ ލިޔުންތައް ގެންގުޅުމުގެ ދައުވާ ކޮށްފައިވެއެވެ.
ކޮމެންޓު ފޮނުވާ