އަންނަ އަހަރުގެ ބަޖެޓުގައި ހިމެނޭ ގޮތަށް ރާއްޖޭގެ ހުރިހާ ރަށެއްގެ ސްކޫލްތަކުގައި ހާއްސަ އެހީއަށް ބޭނުންވާ ކުދިންނަށް ތައުލީމު ދެވޭނެ ނިޒާމެއް ގާއިމުކޮށް، އިންކްލޫސިވް ކްލާސްރޫމްތައް އެޅުމުގެ ބޮޑު މަޝްރޫޢެއް ކުރިއަށްގެންދަން ނިންމާފައިވާ ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެ އެވެ.
ށ. ފުނަދޫގެ ރައްޔިތުންނާ ބައްދަލުކުރައްވައި ރައީސް ވިދާޅުވީ އާ މަޝްރޫޢުތަކަށް އަންނަ އަހަރުގެ ބަޖެޓުގައި ތިން ބިލިއަން ރުފިޔާ ކަނޑައަޅާއިރު އެންމެ ބޮޑު އިސްކަމެއް ދެއްވާނީ ތައުލީމާއި ސިއްހީ ދާއިރާއަށް ކަމަށެވެ. ތައުލީމީ ދާއިރާއަށް 500 މިލިއަން ރުފިޔާ ހާއްސަކުރައްވާނެ ކަމަށް ވިދާޅުވި އެވެ.
ރައީސް ވިދާޅުވީ ނުކުޅެދުންތެރިކަން ހުންނަ ކުދިންނަށް ބޭނުންވާ ސަމާލުކަން ދެވޭ ނިޒާމެއް ރާއްޖޭގެ ތައުލީމީ ދާއިރާގައި ފުރިހަމަކުރެވިފައި ނެތް ކަމަށާއި ކުރީގެ ސަރުކާރުތަކުން އެކަށީގެންވާ މަސައްކަތްތަކެއް ކޮށްފައި ނުވާ ކަމަށެވެ. މި ސަރުކާރުން އެ ކުދިންނަށް ވެސް އެހެން ކުދިންނެކޭ އެއްގޮތަށް ސްކޫލްތަކުގައި ކިޔެވޭނެ މަގުފަހިކޮށްދެއްވުމަށް މިހާތަނަށް 80 ޓީޗަރުން ތަމްރީންކޮށްފައިވާ ކަމަށާއި އަންނަ އަހަރު އިތުރު ޓީޗަރުން ވެސް ތަމްރީންކުރާނެ ކަމަށް ވިދާޅުވި އެވެ.
ކޮމެންޓު ފޮނުވާ