މިލަންދޫގައި އިމާރާތް ކުރާ ހޮސްޕިޓަލުގެ ޢަމަލީ މަސައްކަތް ފަށައިފި

ށ.މިލަންދޫގައި އިމާރާތް ކުރާ ހޮސްޕިޓަލުގެ ޢަމަލީ މަސައްކަތް މިއަދު ފަށައިފިއެވެ.

މިލަންދޫ ހޮސްޕިޓަލުގެ ޢަމަލީ މަސައްކަތް ފަށާފައިވަނީ ރައީސް ޑރ. މުޙައްމަދު މުޢިއްޒު މިހާރު ށ. އަތޮޅަށް ކުރައްވަމުންދާ ދަތުރުފުޅުގައި މިލަންދޫއަށް ޒިޔާރާތްކޮށް ބޭއްވި ޚާއްސަ ރަސްމިއްޔާތުގައެވެ.

މިގޮތުން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީީ) އާއި ހަވާލުކޮށްގެން ކުރިއަށްގެންދާ މި މަޝްރޫޢުގެ ޢަމަލީ މަސައްކަތް ފައްޓަވައިދެއްވީ މިނިސްޓަރ އޮފް ފިނޭންސް އެންޑް ޕްލޭނިންގ، އޮނަރަބަލް މޫސާ ޒަމީރު އެވެ.

މީގެ އިތުރުން މި ރަސްމިއްޔާތުގައި ކެބިނެޓު މިނިސްޓަރުންނާއި ރައްޔިތުންގެ މަޖިލީހުގެ މެންބަރުންނާއ،ި އެމްޓީސީސީގެ މެނޭޖިން ޑިރެކްޓަރ، ޑެޕިއުޓީ ކޮމިޝަނާ އޮފް ޕޮލިސް (ރިޓަޔަރޑް) އަޙުމަދު ސަޢުދީ އާއ،ި މިލަންދޫ ކައުންސިލް މެންބަރުން އަދި ސަރުކާރުގެ އިދާރާތަކުގެ އިސްވެރިން ބައިވެރިވެވަޑައިގެންނެވިއެވެ.

މި މަޝްރޫޢު އާއި ގުޅޭގޮތުން އެމްޓީސީސީން ބުނެފައިވަނީ، މިލަންދޫ ރައްޔިތުންގެ އެންމެ ބޮޑު އެއް އުންމީދަކީ ޞިއްޙީ ޚިދުމަތުގެ ފެންވަރު އެ ރަށުގައި ރަނގަޅުވެ، ޚިދުމަތްތައް ފުޅާ ދާއިރާއެއްގައި ރައްޔިތުންނަށް ލިބުމަށް ކަމަށެވެ. އެގޮތުން، މިލަންދޫ ހޮސްޕިޓަލްގެ މަސައްކަތް ނިމުމާއެކު، ރަށުގެ ރައްޔިތުންނަށް ރަށުގައި ތިބެގެން ހޯދޭ ޞިއްޙީ ފަރުވާގެ ޚިދުމަތްތައް ފުޅާވެގެންދާނެ ކަމަށް އެ ކުންފުނިން ފާހަގަކޮށްފައިވެއެވެ.

މި މަޝްރޫޢުގެ ދަށުން މިލަންދޫ ހޮސްޕިޓަލުގައި، 38,087 އަކަފޫޓުގެ ސަރަހައްދެއްގައި 30 އެނދު ހިމެނޭ 2 ފަންގިފިލާގެ ޢިމާރާތެއް ބިނާ ކުރެވޭނެއެވެ. އަދި 2,563 އަކަފޫޓުގެ ސަރަހައްދެއްގައި 1 ފަންގިފިލާގެ އެހެނިހެން ޚިދުމަތްތައް ދިނުމަށް ޚާއްސަކޮށް، އިމާރާތެއް ބިނާކޮށް، 3,573 އަކަފޫޓުގެ ސަރަހައްދެއްގައި، މުވައްޒަފުން ތިބުމަށް ޚާއްސަ 2 ފަންގިފިލާގެ އިމާރާތެއްވެސް ބިނާ ކުރުމަށްވަނީ ހަމަޖެހިފައެވެ.

600 ދުވަސްތެރޭގައި ނިންމަން ހަވާލުކުރެވިފައިވާ މި މަޝްރޫޢު އަކީ 110.87 މިލިއަން ރުފިޔާގެ މަޝްރޫޢު އެކެވެ.