ޣައްޒާގައި ސުލްހަ ޤާއިމުކުރުމަށް ތައްޔާރުކޮށްފައިވާ ޕްލޭން ތަންފީޒުކުރުމަށްޓަކައި އެމެރިކާގެ ރައީސް ޑޮނަލްޑް ޓްރަމްޕާ އެކު މަސައްކަތްކުރަން ފުރިހަމައަށް ތައްޔާރަށް ހުންނެވިކަމަށް ފަލަސްތީނުގެ ރައީސް މަހުމޫދު އައްބާސް ވިދާޅުވެއްޖެއެވެ.
އދ.ގެ އާންމު މަޖިލީހުގެ ޖަލްސާއަށް ކުރިން ރެކޯޑުކުރެވިފައިވާ ވީޑިއޯ މެސެޖެއް މެދުވެރިކޮށް ވާހަކަދައްކަވަމުން އައްބާސް ވިދާޅުވީ، ސެޕްޓެމްބަރު 22 ވަނަ ދުވަހު ބޭއްވުނު ކޮންފަރެންސްގައި ފާސްކުރެވުނު ޣައްޒާގެ ސުލްހައިގެ ޕްލޭން ތަންފީޒުކުރުމަށް ޓްރަމްޕްގެ އިތުރުން ސައުދީ އަރަބިއްޔާ، ފްރާންސް އަދި އދ. އާ އެކު މަސައްކަތްކުރަން ބޭނުންފުޅުވާ ކަމަށެވެ. ނިއުޔޯކުގައި ބޭއްވުނު މި ޖަލްސާއަށް އައްބާސް ހާޒިރުވެވަޑައިނުގަތީ ޓްރަމްޕް އެޑްމިނިސްޓްރޭޝަނުން އޭނާއާއި އޭނާގެ ވަފުދަށް ވިސާ ދިނުމަށް އިންކާރުކުރުމުންނެވެ.
ފަލަސްތީނުގެ މުސްތަޤުބަލު ވެރިކަމުގައި ހަމާސްގެ އެއްވެސް ދައުރެއް އޮންނާނެކަމަކަށް ނުދެކޭކަމަށް އައްބާސް ވަނީ ސާފު ބަހުން ވިދާޅުވެފައެވެ. "ފަލަސްތީނުގައި ވެރިކަން ކުރުމުގައި ހަމާސްގެ ދައުރެއް ނޯންނާނެ. ހަމާސް އާއި އެހެން ފެކްޝަންތަކުން ހުރިހާ ހަތިޔާރެއް ފަލަސްތީނުގެ ނޭޝަނަލް އޮތޯރިޓީއާ ހަވާލުކުރަން ޖެހޭނެ" އޭނާ ވިދާޅުވިއެވެ.
އޮކްޓޯބަރު 7 ވަނަ ދުވަހު ހަމާސްއިން އިސްރާއީލަށް ކުރި ހަމަލާ ކުށްވެރިކުރައްވަމުން އައްބާސް ވިދާޅުވީ، އެ ހަމަލާތަކަކީ ފަލަސްތީނުގެ ރައްޔިތުން ތަމްސީލުކުރާ ކަންކަމެއް ނޫންކަމަށާއި، އިސްރާއީލުގެ އާންމު ފަރުދުންނަށް އަމާޒުކޮށްގެން ކުރި ހަމަލާތަކާއި ރަހީނުކުރި އަމަލުތައް ކުށްވެރިކުރައްވާ ކަމަށެވެ. މިނިވަންކަމަށް ކުރާ އިންސާފުވެރި މަސައްކަތްތަކާ މި ހަމަލާތައް ނުގުޅޭކަމަށް ވެސް އޭނާ ފާހަގަކުރެއްވިއެވެ.
ޔަހޫދީންނާ ދެކޮޅަށް ކުރެވޭ ކަންކަން ކުށްވެރިކުރައްވާކަމަށް ވިދާޅުވެ، ފަލަސްތީނުގެ ރައްޔިތުން ކުރިމަތިލާންޖެހިފައިވާ ދަތި ހާލަތްތަކުގައިވެސް އިންސާނީ އުސޫލުތަކަށް ފަލަސްތީނުން ހުރުމަތްތެރިކޮށް ހިތާނެކަމުގެ ޔަޤީންކަން އައްބާސް ދެއްވިއެވެ.
ކޮމެންޓު ފޮނުވާ