ސަރުކާރު ބަދަލުވިތާ ވޭތުވެދިޔަ މުއްދަތުގައި ސިއްހީ ދާއިރާއަށް ހާހެއްހާ މުވައްޒަފުން އިތުރުކޮށްފައިވާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވެއްޖެއެވެ. ދުނިޔޭގެ ބަލިމީހުންގެ ރައްކާތެރިކަމުގެ ދުވަސް ފާހަގަކުރުމަށް މިއަދު ބޭއްވި ޖަލްސާގައި ވާހަކަފުޅު ދައްކަވަމުން މިނިސްޓަރު މިކަން ހާމަކުރެއްވީއެވެ.
މިނިސްޓަރު ނާޒިމް ވިދާޅުވިގޮތުގައި ސިއްހީ ޚިދުމަތް ފޯރުކޮށްދިނުމުގައި އެންމެ މުހިންމު ކަމަކީ ބަލިމީހުންގެ ރައްކާތެރިކަން ކަށަވަރުކުރުމެވެ. ވޭތުވެދިޔަ އަހަރު ޑަބްލިއުއެޗްއޯއިން ނެރުނު ދުނިޔޭގެ ޕޭޝަންޓް ސޭފްޓީ ރިޕޯޓަށް ހަވާލާދެއްވައި އޭނާ ފާހަގަކުރެއްވީ، ސިއްހީ ޚިދުމަތުގައި ދިމާވާ އެންމެ ބޮޑު ގޮންޖެހުމަކީ ރައްކާތެރި މިންގަނޑުތަކަށް ނުފެތޭ ފަރުވާ ދިނުމުގެ މައްސަލަ ކަމަށެވެ.
ރައްކާތެރިނޫން ފަރުވާގެ 12 ޕަސެންޓު ޙާލަތްތަކުގައި ދާއިމީ ނުކުޅެދުންތެރިކަން ނުވަތަ މަރު ހިމެނޭއިރު، އަހަރަކު ގާތްގަނޑަކަށް ތިން މިލިއަން މީހުން މިކަހަލަ ފަރުވާގެ ސަބަބުން މަރުވާ ކަމަށާއި، މި މަރުތަކުގެ ތިންބައިކުޅަ ދެބައި ސަލާމަތްކުރެވިދާނެ ކަމަށް އެ ރިޕޯޓުގައި ބުނެފައިވާ ކަމަށް މިނިސްޓަރު ވިދާޅުވިއެވެ.
ސިއްހީ ޚިދުމަތުގެ ފެންވަރު ރަނގަޅުކުރުމަށް ގަވައިދުތަކާއި އުސޫލުތައް ހަދައި، މުވައްޒަފުން އަހުލުވެރިކޮށް، އެ އުސޫލުތައް ތަންފީޒުކުރުން މުހިންމު ކަމަށް ނާޒިމް ވިދާޅުވިއެވެ. ލައިސެންސިން ސޮފްޓްވެއާ، ޕޭޝަންޓް ސޭފްޓީ ޗެންޕިއަންސް ޓްރެއިނިން ޕްރޮގްރާމާއި ޕޭޝަންޓް ސޭފްޓީ ޕާތުވޭގެ މަސައްކަތްތައް އައިޖީއެމްއެޗާއި ހުޅުމާލެ ހޮސްޕިޓަލާއި ވިލިމާލެ ހޮސްޕިޓަލުގައި ފެށިފައިވާ ކަމަށް އޭނާ ހާމަކުރެއްވިއެވެ.
ސިއްހީ ދާއިރާގެ އިންފްރާސްޓްރަކްޗަރ ތަރައްޤީކުރުމަށް ސަރުކާރުން ބުރަ މަސައްކަތް ކުރަމުންދާ ކަމަށް ވިދާޅުވެ، މިނިސްޓަރު ފާހަގަކުރެއްވީ ދަރުމަވަންތަ ހޮސްޕިޓަލް، އައިޖީއެމްއެޗް އަދި ހުޅުމާލެ ހޮސްޕިޓަލް ތަރައްޤީކުރުމުގެ މަސައްކަތް ކުރިއަށް ގެންދާ ކަމަށެވެ.
މި ސަރުކާރު އައުމަށްފަހު ރާއްޖޭގެ ރަށްރަށަށް 400 އަށް ވުރެ ގިނަ ސިއްހީ މުވައްޒަފުން ނެރެފައިވާ އިރު، މާލެ ސަރަހައްދަށް 500 އަށް ވުރެ ގިނަ މުވައްޒަފުން ހޯދާފައިވާ ކަމަށް މިނިސްޓަރު ނާޒިމް ވިދާޅުވިއެވެ. އަދި އައިޖީއެމްއެޗާއި ދަރުމަވަންތަ ހޮސްޕިޓަލްގެ ޚިދުމަތް ފުޅާކުރުމާއި ކެޕޭސިޓީ އިތުރުކުރުމުގެ މަސައްކަތް ކުރިއަށް ގެންދާނެ ކަމަށް ވެސް އޭނާ ވިދާޅުވިއެވެ.
ކޮމެންޓު ފޮނުވާ