ކ. ކާށިދޫ ފަޅުގައި ޓޫރިސްޓް ރިސޯޓެއް ތަރައްގީކޮށް ހިންގުމަށް ފަތުރުވެރިކަމާއި ތިމާވެށްޓާބެހޭ ވުޒާރާއިން އަލުން ބީލަމުގެ ފުރުސަތު ހުޅުވާލައިފިއެވެ. މިއީ މި އަހަރުގެ މެއި މަހު ފުރަތަމަ ފަހަރަށް ހުޅުވާލި ފުރުސަތަށްފަހު، ދެވަނަ ފަހަރަށް ހުޅުވާލާ ފުރުސަތެކެވެ.
މި މަޝްރޫއުގެ ދަށުން ކާށިދޫ ފަޅުގެ 115.21 ހެކްޓަރުގެ ސަރަހައްދުގައި 10 ހެކްޓަރުގެ ރަށެއް ހިއްކައިގެން ރިސޯޓެއް ތަރައްގީ ކުރެވޭނެއެވެ. މި ފުރުސަތުގައި ޝައުގުވެރިވާ ފަރާތްތަކަށް ބީލަން ފޮތް ލިބެން ހުންނާނީ 14 ސެޕްޓެންބަރުން ފެށިގެން 19 ނޮވެންބަރު 2025 ގެ ނިޔަލަށެވެ. ބަންދު ނޫން ކޮންމެ ދުވަހެއްގެ ހެނދުނު 9:00 އިން 13:00 އަށް ފަތުރުވެރިކަމާއި ތިމާވެށްޓާބެހޭ ވުޒާރާގެ ވޭލާނާގެ 5 ވަނަ ފަންގިފިލާގެ ރިސެޕްޝަނުން ބީލަން ފޮތް ލިބިގަނެވޭނެއެވެ.
ބީލަން ހުށަހަޅަން ޖެހޭ ސުންގަޑިއަކީ 20 ނޮވެންބަރު 2025 ވާ ދުވަހުގެ 13:00 ކަމަށް ވުޒާރާއިން ބުނެއެވެ. އަދި މި މަޝްރޫއާ ގުޅޭ މަޢުލޫމާތު ސާފުކުރުމަށް މައިކްރޯސޮފްޓް ޓީމްސް މެދުވެރިކޮށް ދެ ވަރޗުއަލް ބައްދަލުވުމެއް ބޭއްވުމަށް ހަމަޖެހިފައިވާ ކަމަށް ވުޒާރާއިން މަޢުލޫމާތު ދީފައިވެއެވެ. އެގޮތުން ފުރަތަމަ ބައްދަލުވުން ބޭއްވޭނީ 24 ސެޕްޓެންބަރު 2025 ގައި ކަމަށާއި ދެވަނަ ބައްދަލުވުން ބޭއްވޭނީ 21 އޮކްޓޫބަރު 2025 ގައި ކަމަށް ވުޒާރާއިން ބުނެއެވެ.
މި ބީލަމާ ގުޅޭ އިތުރު މަޢުލޫމާތު ސާފުކުރުމަށް 19 ނޮވެންބަރު 2025 ގެ 13:00 ގެ ކުރިން [email protected] އަށް އީމެއިލް ކުރެވިދާނެ ކަމަށް ފަތުރުވެރިކަމާއި ތިމާވެށްޓާބެހޭ ވުޒާރާއިން އަންގާފައިވެއެވެ. ކާށިދޫ ފަޅަކީ ރާއްޖޭގެ ފަތުރުވެރިކަން ތަރައްގީކުރުމަށް ސަރުކާރުން ކަނޑައަޅާފައިވާ ސަރަހައްދުތަކުގެ ތެރެއިން ސަރަހައްދެއް ކަމަށާއި މި ފުރުސަތުގައި ބައިވެރިވާ ފަރާތްތަކުން ރިސޯޓް ތަރައްގީކޮށް ހިންގުމުގެ އިތުރުން ރަށް ހިއްކުމުގެ މަސައްކަތްވެސް ކުރަންޖެހޭނެ ކަމަށް ވުޒާރާއިން ބުނެއެވެ.
ކޮމެންޓު ފޮނުވާ