ރައީސް ޑރ. މުހައްމަދު މުއިއްޒުގެ ފުރާނަ ނަގާލާނެ ކަމަށް ބުނެ ސޯޝަލް މީޑިއާގައި އިންޒާރު ދިން މައްސަލައެއް ފުލުހުން ތަހުގީގުކުރަން ފަށައިފިއެވެ. މި އިންޒާރު ދީފައިވަނީ ފޭސްބުކްގައި "މަސީޙް މޫސާ" ގެ ނަމުން ހަރަކާތްތެރިވާ އެކައުންޓަކުންނެވެ.
މި ޝަހުސް ރައީސަށް އިންޒާރު ދިން ޕޯސްޓު ކޮށްފައިވަނީ، މަސްތުވާތަކެތީގެ ވިޔަފާރިކުރާ ފަރާތްތަކަށް އެންމެ ބޮޑު އަދަބު ކަނޑައެޅުމާ ގުޅޭގޮތުން ރައީސް މަޝްވަރާކުރުމަށް އެދިވަޑައިގެންނެވި ކަމުގެ ހަބަރަކާ ގުޅިގެންނެވެ. އެ ޕޯސްޓުގައި ރައީސްގެ ހަޔާތަށް ސީދާ ނުރައްކާވާނެ ފަދަ އިންޒާރެއް ދީފައިވާކަމަށް ފުލުހުން ބުނެއެވެ.
ފުލުހުން މިރޭ ނޫސްވެރިންނަށް ފޮނުވި ބަޔާނެއްގައި ވިދާޅުވީ، މި މައްސަލަ ވަރަށް ބޮޑަށް ކަންބޮޑުވާ މައްސަލައެއްގެ ގޮތުގައި ބަލައި، ވަގުތުން ތަހުގީގު ފަށައިގަތް ކަމަށެވެ. އަދި މިފަދަ އަމަލުތަކަކީ ގާނޫނީ ގޮތުން ވަރަށް ބޮޑު ކުށެއް ކަމަށާއި، މި މައްސަލައިގައި ޝާމިލުވާ ފަރާތްތައް ހޯދައި ގާނޫނީ ފިޔަވަޅު އަޅާނެ ކަމަށް ފުލުހުން ބުނެއެވެ.
މީގެ ކުރިން ވެސް ސޯޝަލް މީޑިއާ މެދުވެރިކޮށް ރައީސަށް މަރުގެ އިންޒާރު ދިން މައްސަލައެއް 2024 ވަނަ އަހަރުގެ ސެޕްޓެމްބަރު މަހު ފުލުހުން ތަހުގީގުކޮށްފައިވެއެވެ. އެހެންނަމަވެސް އެ މައްސަލަ ކުރިއަށް ދިޔަގޮތާއި ފިޔަވަޅު އެޅުނު ފަރާތްތަކުގެ މަޢުލޫމާތު ފުލުހުން ހާމަކޮށްފައެއް ނުވެއެވެ.
ސިޔާސީ ލީޑަރުންނަށް ސޯޝަލް މީޑިއާ މެދުވެރިކޮށް ނުރައްކާތެރި އިންޒާރުތައް ދިނުމަކީ ފަހަކަށް އައިސް އިތުރުވަމުން އަންނަ ކަމެކެވެ. މިފަދަ ޢަމަލުތަކުން ދުރުހެލިވުމަށް ފުލުހުން އަބަދުވެސް އިލްތިމާސް ކުރަމުން އަންނަ އިރު، މިފަދަ ކަންކަން ކުރާ ފަރާތްތަކާމެދު ހަރުކަށި ފިޔަވަޅު އެޅޭނެ ކަމަށް ފުލުހުން ވަނީ އިންޒާރު ދީފައެވެ.
ކޮމެންޓު ފޮނުވާ