ހުޅުމާލޭގައި އަލަށް ޢިމާރާތްކުރެވުނު ކްރިމިނަލް ކޯޓާއި ޑްރަގް ކޯޓުގެ އައު އިމާރާތް ރަސްމީކޮށް މިއަދު ހުޅުވައިފިވެ. އިމާރާތް ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
މި އިމާރާތުގައި މަސައްކަތްކުރައްވާ 17 ފަނޑިޔާރުންގެ ތެރެއިން 5 ފަނޑިޔާރުންނަކީ ކްރިމިނަލް ކޯޓުގެ ފަނޑިޔާރުންނެވެ. އަދި 12 ފަނޑިޔާރުންނަކީ ޑްރަގް ކޯޓުގެ ފަނޑިޔާރުންނެވެ. މީގެ އިތުރުން، ފަނޑިޔާރުންނަށް ޚާއްޞަ ބިއުރޯއަކާއި، ދައުލަތުގެ ވަކީލުންނާއި ދިފާޢީ ވަކީލުންނަށް ޚާއްޞަ ރޫމްތަކެއްވެސް މި އިމާރާތުގައި ޤާއިމްކުރެވިފައިވެއެވެ.
އިމާރާތް ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާގެ އިތުރުން، ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛް އަމްޖަދު މުސްތަފާ، ބަންޑާރަ ނައިބު އަޙްމަދު އުޝާމް، އަދި ޖުޑީޝަލް ސަރވިސް ކޮމިޝަންގެ ރައީސް އަލްއުސްތާޛް ޙުސައިން ރިޟާ ބައިވެރިވެވަޑައިގެންނެވިއެވެ. އަދި މަޤާމުން ރިޓަޔަރ ކުރެއްވި އުއްތަމަ ފަނޑިޔާރު މުޢުތަޞިމް ޢަދުނާންވެސް ވަޑައިގެންނެވިއެވެ.
ރައީސުލްޖުމްހޫރިއްޔާގެ މިއަހަރުގެ ރިޔާސީ ބަޔާނުގައި ފާހަގަކުރެއްވި ފަދައިން، ޖިނާއީ ޢަދުލުގެ ނިޒާމުގެ އެންމެ ބޮޑު އެއް ގޮންޖެހުމަކީ މައްސަލަތަކުގެ އަޑުއެހުންތައް ލަސްވެ، ޙުކުމަކާ ހަމައަށް ވާޞިލުނުވެ ދިގުލައިގެން ދިއުމެވެ. މި މައްސަލަ ޙައްލުކުރުމަށް އެޅޭ މުހިންމު ފިޔަވަޅެއްގެ ގޮތުގައި މި އިމާރާތް ފާހަގަކުރެވެއެވެ.
ކްރިމިނަލް ކޯޓާއި ޑްރަގް ކޯޓުގެ އައު އިމާރާތް ހުޅުވުމަކީ ދިވެހިރާއްޖޭގެ ޝަރުޢީ ދާއިރާއަށް ލިބުނު ވަރަށް މުހިންމު ކުރިއެރުމެކެވެ. މި އިމާރާތުގެ ސަބަބުން ކޯޓުތަކަށް ދިމާވެފައިވާ ޖާގައިގެ ދަތިކަން ޙައްލުވެ، ޝަރީޢަތްތައް އަވަސް މިނެއްގައި ކުރިއަށް ގެންދިއުމަށް މަގުފަހިވެގެންދާނެއެވެ. އަދި މުސްތަޤުބަލުގައި ހުޅުމާލޭގައި ތަރައްޤީކުރުމަށް ރޭވިފައިވާ ސުޕީރިއަރ ކޯޓު ކޮމްޕްލެކްސްއާއެކު، ޢަދުލު އިންޞާފުގެ ދާއިރާ އިތުރަށް ހަރުދަނާވެގެންދާނެކަން ޔަޤީނެވެ.
ކޮމެންޓު ފޮނުވާ