ދިވެހިރާއްޖޭގައި މަސައްކަތްކުރާ ބިދޭސީންނަށް ސިއްހީ ޚިދުމަތްތައް ފޯރުކޮށްދިނުމަށް ޚާއްސަކޮށް އެކުލަވާލި "ނެޝަނަލް މައިގްރަންޓް ހެލްތު ޕޮލިސީ" މިއަދު ސަރުކާރުން ތައާރަފުކޮށްފިއެވެ. ހެލްތު މިނިސްޓަރު އަބްދުﷲ ނާޒިމް އިބްރާހީމް ބައިވެރިވެވަޑައިގެންނެވި ޚާއްސަ ރަސްމިއްޔާތެއްގައި މި ސިޔާސަތު ރަސްމީކޮށް އިފްތިތާހުކުރެއްވިއެވެ.
މި ސިޔާސަތުގެ މައިގަނޑު މަގުސަދަކީ ރާއްޖޭގައި މަސައްކަތްކުރަމުން ގެންދާ ބިދޭސީން ސިއްހީ ގޮތުން ބަލަހައްޓައި، އެމީހުންނަށް ފެންވަރު ރަނގަޅު ސިއްހީ ފަރުވާ ލިބޭނެ މަގު ތަނަވަސްކޮށްދިނުމެވެ. މީގެ އިތުރުން ރާއްޖޭގެ ސިއްހީ ނިޒާމުގެ ތެރޭގައި ބިދޭސީންގެ ސިއްހަތު ރައްކާތެރިކުރުމަށް ކުރެވޭ މަސައްކަތްތައް ވަރުގަދަކުރުން ހިމެނެއެވެ.
ސިޔާސަތު އެކުލަވާލުމުގައި މިނިސްޓްރީ އޮފް ހެލްތު، ހެލްތު ޕްރޮޓެކްޝަން އެޖެންސީ، އިންޓަރނޭޝަނަލް އޯގަނައިޒޭޝަން ފޯރ މައިގްރޭޝަން (އައި.އޯ.އެމް) އަދި ސަރުކާރުގެ އެކި އިދާރާތަކާއި އަހުލީ ޖަމްއިއްޔާތަކުގެ ފުރިހަމަ އެއްބާރުލުން ލިބިފައިވެއެވެ. ޚާއްސަކޮށް އައި.އޯ.އެމް ޑިވެލޮޕްމަންޓް ފަންޑުން މި މަޝްރޫއަށް ބޭނުންވާ ފަންނީ އަދި މާލީ އެހީތެރިކަން ފޯރުކޮށްދިންކަން ފާހަގަކުރެވެއެވެ.
މި ސިޔާސަތު އެކުލަވާލުމުގައި ސަރަހައްދީ ގައުމުތަކުގައި ބިދޭސީންގެ ސިއްހީ ކަންކަން ބަލަހައްޓާ ގޮތާއި އެ ގައުމުތަކުގައި އަމަލުކުރާ އުސޫލުތަކަށް ވަނީ ރިއާޔަތްކޮށްފައެވެ. އަދި މި މަސައްކަތުގައި ކަމާބެހޭ ފަރާތްތަކާ ދިގު ލައިގެން ކުރި މަޝްވަރާތަކުގެ އަލީގައި، އެންމެ ފައިދާހުރި ގޮތްތައް ކަނޑައެޅިފައިވާކަން ސަރުކާރުން ފާހަގަކުރެއެވެ.
ނެޝަނަލް މައިގްރަންޓް ހެލްތު ޕޮލިސީގެ މައިގަނޑު ލަނޑުދަނޑިތަކުގެ ތެރޭގައި، ކަމާގުޅޭ އެކި ދާއިރާތައް ގުޅުވައިގެން މަސައްކަތްކުރާނެ ނިޒާމެއް ގާއިމުކުރުން ހިމެނެއެވެ. މީގެ ސަބަބުން ބިދޭސީންގެ މެދުގައި ފެތުރޭ ބަލިތަކުގެ މިންވަރު ކުޑަކޮށް، އެމީހުން ރާއްޖެ އައުމުން ފެށިގެން ރާއްޖޭގައި އުޅޭ ހުރިހާ ވަގުތެއްގައި ސިއްހީ ގޮތުން ރަނގަޅު ހާލަތުގައި ތިބުމަށް މަގުފަހިވާނެއެވެ.
މީގެ އިތުރުން ދެމެހެއްޓެނިވި ގޮތެއްގައި ބިދޭސީންގެ ސިއްހީ ހާލަތު މޮނިޓަރކޮށް ބެލެހެއްޓުމާއި، ބަލިވެއްޖެ ހާލަތްތަކުގައި އެކަށީގެންވާ ފަރުވާ ހޯދުމަށް ދިމާވާ ދަތިތައް ހައްލުކުރުމަށް މި ސިޔާސަތުގައި ވަނީ ޚާއްސަ ސަމާލުކަމެއް ދީފައެވެ.
ސަރުކާރުން ފާހަގަކުރައްވާ ގޮތުގައި މިއީ ރާއްޖޭގައި ދިރިއުޅޭ ހުރިހާ ފަރާތްތަކަށް ސިއްހީ ގޮތުން ލިބެންޖެހޭ އަސާސީ ހައްގުތައް ކަށަވަރުކުރުމަށް ކުރެވޭ މުހިންމު މަސައްކަތެކެވެ. އަދި އ.ދ.ގެ ދެމެހެއްޓެނިވި ތަރައްގީގެ ލަނޑުދަނޑިތައް ހާސިލުކުރުމަށް ދިވެހިރާއްޖެއިން ކުރާ މަސައްކަތުގެ މުހިންމު ބައެއް ކަމުގައި މި ސިޔާސަތު ވާނެކަމަށް އުންމީދުކުރެވެއެވެ.
ކޮމެންޓު ފޮނުވާ