މާލޭގައި ހުޅުވާ ފުރަތަމަ ޖީޕީ ކްލިނިކުން ދެ މަސް ތެރޭގައި ހިދުމަތް ދޭން ފަށާނެ

މާލޭގައި އާންމު ބަލިތަކަށް ފަރުވާ ދިނުމަށް ގާއިމުކުރާ ފުރަތަމަ ޖެނެރަލް ޕްރެކްޓިސް (ޖީޕީ) ކްލިނިކުގެ މަސައްކަތް ކުރިއަށް އޮތް ދެ މަސް ދުވަހުގެ ތެރޭގައި ނިމޭނެ ކަމަށް ހެލްތު މިނިސްޓަރ އަބްދުﷲ ނާޒިމް އިބްރާހިމް ވިދާޅުވެއްޖެއެވެ. އޭނާ މިހެން ވިދާޅުވީ ބުދަ ދުވަހުގެ ރޭ އެސްއެސްޓީވީގެ ޕްރޮގްރާމެއްގައި ވާހަކަ ދައްކަވަމުންނެވެ.

އައިޖީއެމްއެޗް ހޮސްޕިޓަލުގައި ޑޮކްޓަރަށް ދެއްކުމަށް މީހުން ކިއުގައި މަޑުކުރަން ޖެހޭ މައްސަލަ ހައްލުކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށް މިނިސްޓަރު ފާހަގަ ކުރެއްވި އެވެ. އޭނާ ވިދާޅުވި ގޮތުގައި އެންމެ ބޮޑު ލުޔެއް ރައްޔިތުންނަށް ލިބޭނީ މި ޖީޕީ ކްލިނިކުތަކުގެ ހިދުމަތް ފެށުމުންނެވެ.

ކޮރެލް ބޮލެވާޑްގައި ހުރި މާފަންނު އިމާރާތުގައި ގާއިމުކުރާ ފުރަތަމަ ކްލިނިކުގެ އިމާރާތުގެ މަސައްކަތް މިހާރު ނިމިފައިވާ ކަމަށާއި، މަސައްކަތް ކުރާނެ މުވައްޒަފުން ނެގުމުގެ މަސައްކަތް ކުރިއަށް ގެންދާ ކަމަށް މިނިސްޓަރު ވިދާޅުވި އެވެ. އަދި ދެ ވަނަ ކްލިނިކެއްގެ މަސައްކަތް ވެސް އަވަހަށް ފެށޭނެ ކަމަށް އޭނާ ވިދާޅުވި އެވެ.

ސަރުކާރުގެ ޕްލޭންގައި ވަނީ މާލޭގެ ހަތަރު ސަރަހައްދެއްގައި ޖީޕީ ކްލިނިކު ގާއިމުކުރުމަށެވެ. މީގެ އިތުރުން ހުޅުމާލޭގައި ވެސް ކްލިނިކެއް ގާއިމުކުރާނެ ކަމަށް ވިދާޅުވި މިނިސްޓަރު ފާހަގަ ކުރެއްވީ، ޖުމްލަ ހަ ޖީޕީ ކްލިނިކު ގާއިމުކުރުމަށް ނިންމާފައިވާ ކަމަށެވެ.

ދުނިޔޭގެ ކުރިއަރާފައިވާ ގައުމުތަކުގައި ސިއްހީ ހިދުމަތް ދޭ އުސޫލަށް ރިއާޔަތް ކޮށް، އާދައިގެ ކުދި ބަލިތަކާއި އާއްމު ރޯގާތަކަށް މައި ހޮސްޕިޓަލް ތަކަށް ދިއުމުގެ ބަދަލުގައި ކައިރީގައި ހުންނަ ކްލިނިކުތަކުން ފަރުވާ ހޯދުމަށް ބާރުއަޅަމުންދާ ކަމަށް މިނިސްޓަރު ވިދާޅުވި އެވެ. މި ގޮތަށް ހިދުމަތް ދޭން ފެށުމުން ބަލިމީހުންނަށް އަވަސް އަދި ފަސޭހަ ހިދުމަތެއް ލިބިގެންދާނެ ކަމަށާއި، މައި ހޮސްޕިޓަލުގެ އެމަޖެންސީ ހިދުމަތާއި ސްޕެޝަލިސްޓް ޑޮކްޓަރުންގެ ކިއުތަކަށް ބޮޑު ލުޔެއް ލިބޭނެ ކަމަށް އޭނާ ފާހަގަ ކުރެއްވި އެވެ.

މިނިސްޓަރު ހާމަކުރެއްވި ތަފާސް ހިސާބުތަކުން ދައްކާ ގޮތުގައި އައިޖީއެމްއެޗްގެ އިމަޖެންސީއަށް ދުވާލަކު 400 އަށް ވުރެ ގިނަ މީހުން ޒިޔާރަތް ކުރެ އެވެ. ނަމަވެސް މި އަދަދުގެ ތެރެއިން 300 އެއްހާ މީހުންނަކީ ކޮންމެހެން އެމަޖެންސީއަށް ދާން ޖެހޭ ހާލަތުގައި ނުވާ ބައެއް ކަމަށާއި، މި ބަޔަކަށް ޖީޕީ ކްލިނިކުތަކުން ފުރިހަމަ ހިދުމަތް ދެވިދާނެ ކަމަށް މިނިސްޓަރު ވިދާޅުވި އެވެ.