ރާއްޖޭގައި ލޭ އެޅުމުގެ ހިދުމަތް ދޭ އެންމެހައި މަރުކަޒުތަކުން ފޯރުކޮށްދޭ ހިދުމަތްތަކުގެ މައުލޫމާތު ޑިޖިޓަލް ގޮތުގައި ރައްކާކޮށް ބެލެހެއްޓުމުގެ ނިޒާމެއް ގާއިމުކުރުމުގެ މަސައްކަތް ފަށާފައިވާކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
ދުނިޔޭގެ ލޭ ހަދިޔާކުރާ މީހުންގެ ދުވަސް ފާހަގަކުރުމުގެ ގޮތުން ގައުމީ ޔުނިވަރސިޓީގައި ބޭއްވި ހާއްސަ ރަސްމިއްޔާތެއްގައި ވާހަކަފުޅު ދައްކަވަމުން މިނިސްޓަރު ފާހަގަކުރެއްވީ، ރާއްޖޭގައި ލޭ ހަދިޔާކުރުމާއި ލޭ އެޅުމުގެ ފަރުވާގެ ނިޒާމް ހަރުދަނާކޮށް، ފަރުވާ ބޭނުންވާ ފަރާތްތަކަށް ރައްކާތެރި ގޮތެއްގައި ލޭ ފޯރުކޮށްދެވޭނެ ނިޒާމެއް ގާއިމުކުރުމަކީ ސަރުކާރުގެ މުހިންމު ސިޔާސަތެއްގެ ގޮތުގައި ކަނޑައަޅާފައިވާ ކަމެއް ކަމަށެވެ.
މި އައު ނިޒާމުގެ ދަށުން ކޮންމެ މަހަކު ލޭ އަޅާ ފަރާތްތަކުގެ ސިއްހީ މައުލޫމާތު އެއްކުރެވޭނެކަމަށާއި، މި މައުލޫމާތުގެ އެހީގައި ލޭ ހަދިޔާކުރާ މިންވަރާއި، ލޭގެ ބޭނުން އެންމެ ބޮޑަށް ހުންނަ ހާލަތްތަކާއި، އެކި ސަރަހައްދުތަކުގައި ލޭގެ ބޭނުން ޖެހިފައި ހުންނަ މިންވަރު ދެނެގަނެވޭނެކަމަށް މިނިސްޓަރު ވިދާޅުވިއެވެ. މި މައުލޫމާތަށް ބިނާކޮށް ތަފާތު ދިރާސާތައް ކުރެވި، އޭގެ ނަތީޖާތަކުގެ މައްޗަށް ބިނާކޮށް ރާއްޖެއަށް އެންމެ އެކަށީގެންވާ ލޭގެ ހިދުމަތުގެ ސިޔާސަތުތައް އެކުލަވާލެވޭނެކަމަށް ވެސް މިނިސްޓަރު ނާޒިމް ފާހަގަކުރެއްވިއެވެ.
ހަދިޔާކުރެވޭ ލޭގެ ރައްކާތެރިކަން އިތުރަށް ހަރުދަނާކުރުމުގެ ގޮތުން އެންމެ ފަހުގެ ޓެސްޓިންގ ޓެކްނޮލޮޖީ ބޭނުންކުރަން ފެށުމަށް ނިންމާފައިވާކަމަށާއި، ބްލަޑް ބޭންކަށް ލޭ ހަދިޔާކުރާ ފަރާތްތައް ކަނޑައެޅުމުގައި ބޭނުންކުރާނެ މިންގަނޑުތައް އެކުލަވާލައި، އެ މިންގަނޑުތައް ތަންފީޒުކުރުމުގެ މަސައްކަތް މިއަހަރުގެ ސެޕްޓެމްބަރު މަހުގެ ތެރޭގައި ފެށުމަށް ހަމަޖެހިފައިވާކަމަށް ވެސް މިނިސްޓަރު ހާމަކުރެއްވިއެވެ.
ކޮމެންޓު ފޮނުވާ