ދުންފަތުގެ އިސްތިޢުމާލު ނުކުރާ މީހުންގެ ޙައްޤުތައް ޙިމާޔަތްކުރުމުގެ މުހިންމުކަން ޞިއްޙީ ވަޒީރު ޢަބްދުﷲ ނާޒިމް އިބްރާހިމް މިއަދު ފާހަގަކުރައްވައިފިއެވެ.
ދުނިޔޭގެ ދުންފަތުގެ އިސްތިޢުމާލު ނުކުރާ ދުވަސް ފާހަގަކުރުމުގެ ގޮތުން އަރޓިފިޝަލް ބީޗް ސަރަހައްދުގައި މިއަދު ހަވީރު ބޭއްވުނު ހަރަކާތެއްގައި ވާހަކަފުޅުދައްކަވަމުން ވަޒީރު ވިދާޅުވީ، ދުންފަތުގެ އިސްތިޢުމާލުކުރާ މީހުންގެ ސަބަބުން އެހެން މީހުންގެ ޙައްޤުތަކަށް އުނިކަން އަންނަ ކަމަށެވެ. މި ހަރަކާތަކީ އދ.ގެ އެކި އެޖެންސީތަކާއި ދިވެހި ބައެއް ޖަމްޢިއްޔާތަކުން އިސްނަގައިގެން ބޭއްވި ހަރަކާތެކެވެ.
ވަޒީރު ވިދާޅުވި ގޮތުގައި، ދުންފަތުގެ އިސްތިޢުމާލުކުރާ މީހުންގެ ސަބަބުން ގިނަ ބަޔަކު އެ ނުބައި ޢަމަލަށް ހުށައެޅޭ ކަމަށާއި، އޭގެ ސަބަބުން ކޮންމެ މީހަކަށްވެސް ލިބެންޖެހޭ ފުރިހަމަ ޞިއްޙަތެއްގައި ހުރުމުގެ ޙައްޤު ގެއްލޭ ކަމަށް ފާހަގަކުރެއްވިއެވެ.
މި ހަރަކާތުގައި ވަޒީރު އިތުރަށް ފާހަގަކުރެއްވި ގޮތުގައި، ދިވެހި ތާރީޚުގައި ފުރަތަމަ ފަހަރަށް އާސަންދަ ސްކީމްގެ ތެރެއިން ދުންފަތުން ދުރުވުމަށް ބޭނުންވާ ބޭސްފަރުވާ ހަމަޖައްސައިދީފައިވާ ކަމަށެވެ. މިއީ ދުންފަތުގެ އިސްތިޢުމާލުކުރާ މީހުން މަދުކުރުމަށް އެޅޭ ވަރަށް މުހިންމު ފިޔަވަޅެއް ކަމުގައި ބެލެވެއެވެ.
ދުންފަތާ ދެކޮޅަށް ސަރުކާރުން އަޅަމުންދާ ފިޔަވަޅުތަކުގެ ތެރޭގައި، ދުންފަތުން މީހުން ދުރުކުރުމަށް ބޭނުންވާ ފަރުވާ ދިނުމަށް މަސައްކަތްކުރާ މީހުން ތަމްރީންކުރުމާއި، އިތުރު މީހުން މި ދާއިރާއަށް ނެރުމުގެ މަސައްކަތްތައް ހިމެނޭ ކަމަށް ވަޒީރު ވިދާޅުވިއެވެ.
ކޮމެންޓު ފޮނުވާ