ހައި ކޯޓުގެ އެސިސްޓެންޓް ރަޖިސްޓްރާގެ މަގާމުގައި ހުންނެވި އަދި އެ ކޯޓުގެ އެންމެ ގިނަ ދުވަސްވީ މުވައްޒަފުކަމުގައިވާ ހުސައިން މުހައްމަދު ހަނީފަށް ފެނަކަ ކޯޕަރޭޝަންގެ ލީގަލް ޑިޕާޓްމަންޓްގެ އިސް މަގާމެއް ހަމަޖައްސައިފިއެވެ. މިކަން ހާމަވީ ހަނީފް ހައި ކޯޓުން ވަކުވުމާއި ގުޅިގެންނެވެ.
އެނގިފައިވާ ގޮތުގައި ހަނީފްވަނީ ޖުޑިޝަލް ސާވިސް ކޮމިޝަން (ޖޭއެސްސީ) އަށް ސުޕްރީމް ކޯޓުގެ ފަނޑިޔާރު ޑރ. އަޒްމިރާލްދާ ޒާހިރު، މަހާޒު އަލީ ޒާހިރު އަދި ކުރީގެ ފަނޑިޔާރު ހުސްނުއް ސުއޫދާ ދެކޮޅަށް ބަޔާން ދެއްވައިފައެވެ.
ޖޭއެސްސީން މިހާރު ބަލަމުންދާ މައްސަލަތަކުގެ ތެރޭގައި ހިމެނެނީ ހަނީފް ސުޕްރީމް ކޯޓަށް ހާޒިރުކުރުމަށްފަހު، ހުސްނުއް ސުއޫދު އޭނާއާ ދެކޮޅަށް ހުތުރު ބަހުން ވާހަކަދެއްކެވި ކަމަށް ބުނާ މައްސަލައެވެ. މީގެ އިތުރުން، އެ މަޖިލީހުގައި އަޒްމިރާލްދާ އާއި މަހާޒް އިންނެވި މައްސަލަވެސް ޖޭއެސްސީން ބައްލަވަމުން ގެންދަވައެވެ.
ފަނޑިޔާރުންގެ މައްސަލަތައް ބެލުމާ ގުޅިގެން، ސުޕްރީމް ކޯޓުގައި ހިމެނިވަޑައިގެންނެވި ހުސްނުއް ސުއޫދު ވަނީ މިހާރު އިސްތިއުފާ ދެއްވާފައެވެ. އަދި ސުޕްރީމް ކޯޓުގެ ދެ ފަނޑިޔާރުން ކަމަށްވާ މަހާޒް އަދި އަޒްމިރާލްދާ ވަކިކުރުމުގެ މައްސަލަ މިވަގުތު ވަނީ ރައްޔިތުންގެ މަޖިލީހަށް ހުށަހެޅިފައެވެ.
ކޮމެންޓު ފޮނުވާ