ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ އެންމެ ފަހުގެ ތަފާސް ހިސާބުތަކުން ދައްކާގޮތުގައި، 2025 ވަނަ އަހަރުގެ އޭޕްރީލް މަހުގެ ތެރޭގައި ޑެންގީ ހުމުގެ ރިޕޯޓުކުރެވޭ މިންވަރު ވަނީ ކުރީ މަސްތަކާ އަޅާބަލާއިރު ބޮޑުތަން އިތުރުވެފައެވެ. މިއަހަރުގެ ޖެނުއަރީން ފެށިގެން މިހާތަނަށް ޖުމްލަ 352 ކޭސް ވަނީ ރިޕޯޓުކުރެވިފައެވެ.
މިހާތަނަށް އެންމެ ގިނައިން ޑެންގީ ހުން ޖެހިފައިވާ ސަރަހައްދުތަކުގެ ތެރޭގައި މާލެ ސަރަހައްދު، ރ އަތޮޅު އަދި އއ އަތޮޅު ހިމެނެއެވެ.
ޚާއްސަ ސަމާލުކަމެއް ދޭންޖެހޭ ފަރާތްތައް
އެޗްޕީއޭއިން ވަނީ ޑެންގީއަކީ ހަމައެކަނި ހުންއައުމުގެ އިތުރުން، އެތައް ނުރައްކާތެރި އަސަރުތަކެއް ކުރާ ބައްޔެއްކަމަށް އިންޒާރުދީފައެވެ. ޚާއްސަކޮށް:
• ކުޑަކުދިން • މާބަނޑު އަންހެނުން • އުމުރުން ދުވަސްވީ މީހުން • އެހެނިހެން ބަލިތައް ތަހައްމަލުކުރަމުންދާ މީހުން
މިފަދަ ފަރާތްތަކަށް ޑެންގީގެ ނުރައްކާ އިތުރަށް ބޮޑުވާނެކަމަށް ބުނެފައިވެއެވެ. ވަގުތުން ފަރުވާ ނުހޯދައިފިނަމަ ފުރާނައަށް ނުރައްކާވެދާނެކަމަށް ވެސް އެޗްޕީއޭއިން ވަނީ އިންޒާރުދީފައެވެ.
ޑެންގީއަކީ ކޮބާ؟
ޑެންގީއަކީ އީޑިސް ކިޔާ މަދިރިއެއްގެ ސަބަބުން ޖެހޭ ބައްޔެކެވެ. ރާއްޖެފަދަ ހޫނު ގައުމުތަކުގައި މިބަލި އާންމުކޮށް ފެތުރެއެވެ. ޑެންގީ ޖެހުމުން ފެންނަ އާންމު އަލާމާތްތަކުގެ ތެރޭގައި:
• ކުޑަކަމުދާ މިންވަރު މަދުވުން • ވަރުދެރަވުން • ބަނޑުގައި ރިއްސުން • ގިނަގިނައިން ހޮޑުލުން • ހަށިގަނޑުގެ އެއްވެސް ތަނަކުން ލޭ އައުން
ރައްކާތެރިވާނެ ގޮތްތައް
އެޗްޕީއޭއިން ރައްޔިތުންނަށް ޑެންގީ ހުމުން ރައްކާތެރިވުމަށް އިލްތިމާސްކޮށް، އަންނަނިވި ފިޔަވަޅުތައް އެޅުމަށް އިރުޝާދު ދީފައިވެއެވެ:
- މަދިރި ލޯޝަން/ސްޕްރޭ ބޭނުންކުރުން
- ހަށިގަނޑު ނިވާވާގޮތަށް ފޭރާން ލުން
- ކުޑަދޮރުތަކުގައި މަދިރިދާ ޖެހުން ނުވަތަ ގޭތެރޭގައި މަދިރިގެ ބޭނުންކުރުން
- މަދިރި ގިނަވާ ވަގުތުތަކުގައި ދޮރާއި ކުޑަދޮރުތައް ލައްޕާފައި ބެހެއްޓުން
އެޗްޕީއޭއިން އިތުރަށް އަންގާފައިވާގޮތުގައި، އީޑިސް މަދިރި އާންމުކޮށް ހަފަނީ ދުވާލު ގަޑީގައިކަމަށް ވިޔަސް، ދުވާލާއި ރޭގަނޑު ދެވަގުތުގައިވެސް މަދިރި ހެފުމުން ރައްކާތެރިވުމަށް އިރުޝާދު ދީފައިވެއެވެ.
މިއަހަރުގެ ކުރީކޮޅުއާ އަޅާބަލާއިރު ޑެންގީ ކޭސްތައް އިތުރުވަމުންދާތީ، އޭޕްރީލް މަހުގެ ތެރޭގައި ޑެންގީއަށް ޚާއްސަ ސަމާލުކަމެއް ދީ ރައްކާތެރިވުމަށް ހެލްތު ޕްރޮޓެކްޝަން އެޖެންސީއިން އާންމުންނަށް ގޮވާލައްވާފައިވެއެވެ.
ކޮމެންޓު ފޮނުވާ