ލ. މާވަށުގެ ކަރަންޓުގެ ޚިދުމަތް ދެމެހެއްޓެނިވި ގޮތެއްގައި ފޯރުކޮށްދިނުމަށް އެރަށަށް 800 ކިލޯވޮޓްގެ އައު އިންޖީނެއް ގެންގޮސް، އިންސްޓޯލްކުރުމުގެ މަސައްކަތް ފެށިފައިވާކަމަށް ފެނަކަ ކޯޕަރޭޝަނުން އިއްޔެ ހާމަކުރިއެވެ.
ފެނަކައިން މަޢުލޫމާތު ދެއްވިގޮތުގައި، މިއީ އެރަށުގެ ކަރަންޓުގެ ހާލަތު ރަނގަޅުކޮށް ކެޕޭސިޓީ އިތުރުކުރުމަށް ކުރަމުންދާ މަސައްކަތްތަކުގެ ތެރެއިން އެޅޭ މުހިންމު ފިޔަވަޅެކެވެ. އިންޖީނު އިންސްޓޯލްކުރުމުގެ މަސައްކަތް ކުރިއަށްދާއިރު، ކުރިއަށް އޮތް ހަފްތާއެއްހާ ދުވަހުގެ ތެރޭގައި މަސައްކަތް ނިންމައި ޚިދުމަތަށް ދޫކުރެވޭނެކަމަށް ލަފާކުރެވޭކަމަށްވެސް ފެނަކައިން ބުނެފައިވެއެވެ.
"މާވަށުގެ ރައްޔިތުންނަށް ފޯރުކޮށްދެވޭ ކަރަންޓުގެ ޚިދުމަތް ހަރުދަނާކޮށް، ކަރަންޓު ކެނޑުމުގެ މައްސަލަތަކަށް ދާއިމީ ހައްލެއް ހޯދައިދިނުމަކީ އަޅުގަނޑުމެންގެ އަމާޒެއް" ކަމަށް ފެނަކައިގެ ތަރައްޤީއާ ބެހޭ ޑިޕާޓްމަންޓުން ހާމަކުރިއެވެ.
ލ. މާވަށަކީ އެރަށުގެ އާބާދީއަށް ބަލާއިރު އިތުރު ކަރަންޓުގެ ޚިދުމަތަށް ބޭނުންވެފައިވާ ރަށެއްކަމަށާއި، މިފަދަ ބޮޑު އިންޖީނެއް ބެހެއްޓުމުން ކުރިމަގުގައި ރަށުގެ ތަރައްޤީއަށް މަގުފަހިވެގެންދާނެކަމަށް ފެނަކައިން އިތުރަށް ފާހަގަކޮށްފައިވެއެވެ.
ކޮމެންޓު ފޮނުވާ