ރައީސް ޑރ. މުޙައްމަދު މުޢިއްޒު، ކުރީގެ ކޮމިޝަނަރ އޮފް ޕޮލިސް (ރިޓަޔަރޑް) އަޙްމަދު ފަސީޙް އިމިގްރޭޝަންގެ އައު ކޮންޓްރޯލަރަކަށް ޢައްޔަން ކުރައްވައިފިއެވެ.
ރައީސް އޮފީހުގެ ތަރުޖަމާނު ހީނާ ވަލީދު މިކަން ސޯޝަލް މީޑިއާގައި ޕޯސްޓެއްގައި ވަނީ ކަށަވަރުކޮށްދެއްވާފައެވެ. ހީނާ ވިދާޅުވީ ފަސީޙް ވަނީ ސްޓޭޓް މިނިސްޓަރ ފެންވަރުގައި އައު އިމިގްރޭޝަން ކޮންޓްރޯލަރަކަށް ޢައްޔަންކުރެވިފައި ކަމަށެވެ.
ފަސީޙްގެ މި ޢައްޔަންކުރުން އައިސްފައިވަނީ ކުރީގެ އިމިގްރޭޝަން ކޮންޓްރޯލަރ މުޙައްމަދު ޝަމްއާން ވަޙީދު އެމަޤާމުން ވަކިކުރެވުނުތާ ގަޑިއިރުތަކެއްގެ ތެރޭގައެވެ.
ޝަމްއާން ވަކިކުރެވުނީ އިމިގްރޭޝަން އޮފިސަރުން އެ ބޭފުޅުންގެ މަޤާމުގެ ބޭނުން ހިފައިގެން ބިދޭސީ މަސައްކަތްތެރިންގެ އަތުން ފައިސާ ނެގުމުގެ މައްސަލައެއް ތަޙުޤީޤުކުރަން ފުލުހުން ހަރަކާތްތެރިވަމުންދާ ވަގުތެއްގައެވެ.
ފުލުހުން އެދުވަހު ބުނެފައިވަނީ މި މައްސަލައިގައި މިހާތަނަށް 3 މީހަކު ހައްޔަރުކުރެވިފައިވާ ކަމަށާއި، ނަމަވެސް އެއީ އިމިގްރޭޝަން އޮފިސަރުންކަން ނުވަތަ ނޫންކަން ސާފުކޮށްދީފައެއް ނުވެއެވެ.
މީޑިއާތަކުގައި ޝަމްއާން ވަކިކުރެވުނީ މި ތުހުމަތުތަކާ ގުޅިގެން ކަމަށް ފާހަގަކޮށްފައިވީނަމަވެސް، މިކަން އަދިވެސް ވަނީ އެއްވެސް ރަސްމީ ފަރާތަކުން ކަށަވަރުކޮށްދެއްވާފައެއް ނޫނެވެ.
ކޮމެންޓު ފޮނުވާ