އިސްރާއީލާއެކު އޮންނަ އަސްކަރީ އަދި ޓެކްނޮލޮޖީ ގުޅުން ފުޅާކުރުމަށް ހިމަނައިގެން، 1.15 ޓްރިލިއަން ޑޮލަރުގެ ތާރީޚީ އަސްކަރީ ބަޖެޓެއް އެމެރިކާގެ ހައުސް އޮފް ރެޕްރެޒެންޓެޓިވްސްއިން ބުދަ ދުވަހު ފާސްކޮށްފިއެވެ.
"2027 ނޭޝަނަލް ޑިފެންސް އޮތޮރައިޒޭޝަން އެކްޓް" (އެންޑީއޭއޭ) ގެ ނަމުން ނަންދެވިފައިވާ މި ބިލު، ރިޕަބްލިކަން ޕާޓީގެ އަޣުލަބިއްޔަތު އޮންނަ ހައުސްއިން ފާސްވެގެންދިޔައީ 216-212 ވޯޓުގެ ހަނި ތަފާތަކުންނެވެ. ފާހަގަކޮށްލެވޭ ގޮތުގައި ރިޕަބްލިކަން ޕާޓީގެ ހަތް މެންބަރަކު ބިލާ ދެކޮޅަށް ވޯޓު ދިންއިރު، ޑިމޮކްރެޓިކް ޕާޓީގެ ހަ މެންބަރަކު ބިލަށް ތާއީދުކުރިއެވެ.
މި ބިލަކީ ރައީސް ޑޮނަލްޑް ޓްރަމްޕް އަސްކަރީ ބަޖެޓު ބޮޑުކުރުމަށް ގެންދަވާ މަސައްކަތުގެ ބައެކެވެ. މިދިޔަ އަހަރު 900 ބިލިއަން ޑޮލަރުގައި އޮތް ބަޖެޓު 1.5 ޓްރިލިއަން ޑޮލަރަށް ބޮޑުކުރުމަށް ޓްރަމްޕް ބޭނުންފުޅުވާއިރު، މީގެ މައިގަނޑު ސަބަބެއްކަމަށް ދައްކަނީ މިދިޔަ ފެބްރުއަރީ މަހުގެ ފަހުކޮޅު އެމެރިކާއާއި އިސްރާއީލުން ގުޅިގެން އީރާނާ ދެކޮޅަށް ފެށި ހަނގުރާމައަށް ޚަރަދުކުރުމެވެ.
ބިލާ ދެކޮޅު ހެއްދެވި ރިޕަބްލިކަން މެންބަރު ތޯމަސް މާސީ ވިދާޅުވީ، މި ބިލުގެ ސަބަބުން އެމެރިކާގެ އަސްކަރީ ޓެކްނޮލޮޖީއާއި ސަޕްލައި ޗެއިންތައް އިސްރާއީލުގެ އަސްކަރިއްޔާއާ މަސްހުނިވެގެންދާނެ ކަމަށާއި، މިއީ ގައުމުގެ މިނިވަންކަމަށް ދެވޭ "ޚިޔާނާތެއް" ކަމަށެވެ. އަދި ސެނެޓުން މި ބިލު ފާސްނުވުމަށް ވެސް އޭނާ އުއްމީދުކުރައްވާ ކަމަށް ވިދާޅުވިއެވެ.
އެމެރިކާގެ އާންމު ރައްޔިތުންގެ ބޮޑު ބައެއް އިސްރާއީލަށް ދޭ އަސްކަރީ އެހީ ހުއްޓާލުމަށް ގޮވާލަމުންދާ ދަނޑިވަޅެއްގައި މި ބިލު ފާސްކުރުމުން، ސަރުކާރަށް ބޮޑެތި ފާޑުކިޔުންތަކެއް ވަނީ އަމާޒުވެފައެވެ.
ސެނެޓުގައި ބިލަށް ބޮޑެތި ހުރަސްތަކެއް ކުރިމަތިވާނެ ކަމަށް ސިޔާސީ މުހައްލިލުން ވަޒަންކުރެއެވެ. ސެނެޓުގެ މައިނޯރިޓީ ލީޑަރު ޗަކް ޝޫމާ ވަނީ، މި ބިލަކީ އީރާނު ހަނގުރާމައަށް ދެވޭ "ހުއްދަ ކަރުދާހެއް" ކަމަށް ސިފަކުރައްވާފައެވެ. ހަމައެއާއެކު، ގައުމުގެ އިޖުތިމާއީ ޚިދުމަތްތަކުގެ ބަޖެޓު ކުޑަކުރަމުންދާ ދަނޑިވަޅެއްގައި މިހާ ބޮޑު އަދަދެއް އަސްކަރިއްޔާއަށް ހޭދަކުރުމަކީ ޑިމޮކްރެޓުން ގަބޫލުކުރާ ކަމެއް ނޫނެވެ.
ފާހަގަކޮށްލެވޭ ގޮތުގައި މި ބިލުގައި ޔޫކްރެއިނަށް ދޭ އެހީގެ އިތުރުން، ވޯޓުލުމުގެ ނިޒާމަށް ހަރުކަށި ބަދަލުތަކެއް ގެނައުމަށް ހުށަހަޅާފައިވާ "ސޭވް އެމެރިކާ އެކްޓް" ވެސް ހިމެނެއެވެ. މިއީ އެމެރިކާގެ އިންތިޚާބުތަކުގައި މަކަރު ހަދާ ކަމަށް ބުނެ ޓްރަމްޕް ދައްކަވަމުން ގެންދަވާ ވާހަކަތަކާ ގުޅިގެން ގެންނަން މަސައްކަތްކުރާ ބަދަލުތަކެކެވެ.
ކޮމެންޓު ފޮނުވާ