ރައީސް ޑރ. މުހައްމަދު މުއިއްޒު، ރާއްޖޭގެ އުތުރު ސަރަހައްދަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހއ. ތަކަންދޫގައި އެރަށު ކައުންސިލްގެ އައު އިމާރާތުގެ ބިންގާ އެޅުމުގެ ރަސްމިއްޔާތުގައި ބައިވެރިވެވަޑައިގެންނެވިއެވެ. މި ރަސްމިއްޔާތުގައި ކައުންސިލްގެ ބިންގާ އަޅުއްވައިދެއްވީ ކައުންސިލް ރައީސް އަދި ސިޓީތަކާބެހޭ ވަޒީރު އާދަމް ޝަރީފް އުމަރެވެ.
މި އިމާރާތަކީ ކޮންޓްރެކްޓަރ ފައިނޭންސް އުސޫލުން އިމާރާތްކުރެވޭ 55 ކައުންސިލް އިމާރާތުގެ ތެރެއިން އެއް އިމާރާތެވެ. މި މަޝްރޫޢުގެ ދަށުން ހުރިހާ ކައުންސިލް އިދާރާތަކުގެ އައު އިމާރާތްތަކުގެ މަސައްކަތް ކުރިއަށް ގެންދަނީ މެލޭޝިއާގެ ކުންފުންޏެއް ކަމަށްވާ "ހެކްސްޓާ ގްލޯބަލް" އިންނެވެ.
ލާމަރުކަޒީ ނިޒާމުގެ ދަށުން ކައުންސިލްތައް ބާރުވެރިކުރުމަށް ރައީސް މުއިއްޒު ދެއްވާ ޚާއްސަ އިސްކަމުގެ ދަށުން ކުރިއަށްގެންދެވޭ މި މަޝްރޫޢުގެ ސަބަބުން ކައުންސިލްތަކުގެ ހިންގުން ހަރުދަނާވެ، ރައްޔިތުންނަށް ދެވޭ ޚިދުމަތްތައް އިތުރަށް ފުޅާވެގެންދާނެއެވެ.
ރައީސްގެ މި ދަތުރުފުޅުގައި އިއްޔެ ހއ. މުރައިދޫ، ފިއްލަދޫ އަދި އުތީމަށް ވަޑައިގެން، އެ ރަށްރަށުގެ ކައުންސިލް އިމާރާތްތަކުގެ ބިންގާވެސް އަޅުއްވައިދެއްވާފައިވެއެވެ.
ކޮމެންޓު ފޮނުވާ