ތެލެސީމިއާ ބައްޔަށް ފަރުވާ ހޯދުމަށް ދައުލަތުގެ ހަރަދުގައި ބޯން މެރޯ ޓްރާންސްޕްލާންޓް ހެދުމަށް ފޮނުވާލި 6 ކުއްޖަކު، ކާމިޔާބުކަމާއެކު އެ އޮޕަރޭޝަން ނިންމައި އެނބުރި ރާއްޖެ އައިސްފިއެވެ.
2023 ވަނަ އަހަރު ސަރުކާރުން ވަނީ އާސަންދައިގެ ދަށުން ބޯން މެރޯ ޓްރާންސްޕްލާންޓް ހިލޭ ހަދައިދޭން ނިންމާފައެވެ. އަދި އެގޮތުން މިދިޔަ އަހަރުގެ ތެރޭގައި 6 ކުދިން ވަނީ ފޮނުވާލާފައެވެ. މިފަހަރު އެނބުރި ރާއްޖެ އައިސްފައިވަނީ މިދިޔަ އަހަރު ފޮނުވި ކުދިންނެވެ.
މި މައުލޫމާތު ހާމަކޮށްފައިވަނީ ހެލްތު މިނިސްޓްރީގެ ދަށުން ހިންގާ މޯލްޑިވްސް ބްލަޑް ސާވިސްއިންނެވެ. އެކްސްގައި ކުރި ޕޯސްޓެއްގައި ބުނެފައިވަނީ މިއީ ސަރުކާރުން ތެލަސީމިއާ ކުދިންނަށް އިތުރު ފަރުވާ ހޯދައިދިނުމަށް ކުރާ މަސައްކަތް ފެނިގެންދާ ކަމެއް ކަމަށެވެ.
ސަރުކާރުން ކުރިން ހާމަކޮށްފައިވާ ގޮތުގައި ދައުލަތުގެ ހަރަދުގައި ބޯންމެރޯ ހެދުމަށް 40 ކުދިން ވަނީ ލިސްޓުކޮށްފައެވެ. އަދި މި މަޝްރޫއަށް 56 މިލިއަނެއްހާ ރުފިޔާ ހަރަދުވާނެ ކަމަށް ވަނީ ބުނެފައެވެ. ކުދިން ފޮނުވަނީ އެޗްއެލްއޭ ޓެސްޓު ހަދައި، އެ ޓެސްޓުތައް ރިވިއު ކުރުމަށްފަހު، ކުދިންގެ ސިއްހީ ހާލަތަށް ރިއާޔަތްކޮށްގެންނެވެ.