ކުރީގެ ރައީސް މައުމޫން އަބްދުލް ގައްޔޫމް އުފައްދެވި ފުރަތަމަ ސިޔާސީ ޕާޓީ، ދިވެހި ރައްޔިތުންގެ ޕާޓީ (ޑީ.އާރް.ޕީ) އަށް ދަރަންޏަށް ޒިންމާވާންޖެހޭ މައްސަލަ ސުޕްރީމް ކޯޓުން ބަލަން ތާވަލުކޮށްފިއެވެ.
އިލެކްޝަންސް ކޮމިޝަނުން (އީ.ސީ) ޑީ.އާރް.ޕީ އުވާލުމަށްފަހު، އެ ޕާޓީއަށް ޚިދުމަތެއް ފޯރުކޮށްދިނުމަށް ދައްކަންޖެހޭ 1.1 މިލިއަން ރުފިޔާ ހޯދުމަށް، ޑީ.އާރް.ޕީގެ ފުރަތަމަ ލީޑަރު މައުމޫނުގެ މައްޗަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އިން ދަޢުވާކުރިއެވެ.
މި ދަރަންޏަށް މައުމޫން ޒިންމާވާކަށް ނުޖެހޭނެ ކަމަށް ސިވިލް ކޯޓުން ޙުކުމްކުރިއެވެ.
އޭގެފަހުން، އެމް.ޓީ.ސީ.ސީ އިން މި މައްސަލަ ހައިކޯޓަށް އިސްތިއުނާފުކުރިއެވެ. މި މައްސަލަ ބަލައިނުގަނެވޭނެކަމަށް ކަނޑައަޅައިދިނުމަށް މައުމޫން ހައިކޯޓުގައި އެދުނެވެ. ނަމަވެސް މައްސަލަ ކުރިއަށް ގެންދިއުމަށް ހައިކޯޓުން ނިންމިއެވެ.
އެހެންކަމުން، މައުމޫން ވަނީ ވޭތުވެދިޔަ އަހަރުގެ އޭޕްރީލް މަހު ހައިކޯޓުގެ ނިންމުން ސުޕްރީމް ކޯޓުގައި އިސްތިއުނާފުކުރައްވާފައެވެ.
ސުޕްރީމް ކޯޓުން މި އިސްތިއުނާފު މައްސަލަ ބުދަ ދުވަހުގެ ހެނދުނު 9:00 އަށް ތާވަލުކޮށްފައިވެއެވެ. މި މައްސަލަ ބައްލަވާނީ ޖަސްޓިސް ޑރ. އަޒްމިރާލްދާ ޒާހިރު، ޖަސްޓިސް އައިޝާ ޝުޖޫން އަދި ޖަސްޓިސް މުޙައްމަދު އިބްރާހީމެވެ.
ޑީ.އާރް.ޕީ އިން ނަގާފައިވާ ދަރަންޏަށް މައުމޫނު ޒިންމާވާކަށް ނުޖެހޭނެކަމުގެ ވާހަކަ އެމަނިކުފާނު އަބަދުވެސް ދައްކަވަމުން ގެންދަވައެވެ.
މި މައްސަލައިގައި ސިވިލް ކޯޓުގެ ޙުކުމުގައި ބަޔާންކޮށްފައިވާ ގޮތުގައި، ތިންވަނަ ފަރާތަކުން ޑީ.އާރް.ޕީގެ ދަރަންޏަށް ޒިންމާވާނީ އެކަމަށް އެއްބަސްވާނަމައެވެ. މައުމޫން މި ދަރަންޏަށް ޒިންމާވުމަށް އިންކާރުކުރައްވާތީ، އެމަނިކުފާނު މި ދަރަންޏަށް ޒިންމާވާކަށް ނުޖެހޭނެކަމަށް ކޯޓުން ބުނެފައިވެއެވެ.
މައުމޫން ވަނީ ޑީ.އާރް.ޕީގެ ލީޑަރެއްގެ ގޮތުގައި އެ ޕާޓީ އުފައްދަވާފައެވެ. އަދި 2008 ވަނަ އަހަރުގެ ރިޔާސީ އިންތިޚާބުގައި ޑީ.އާރް.ޕީގެ ކެންޑިޑޭޓެއްގެ ގޮތުގައި ވާދަކުރެއްވިއެވެ. ނަމަވެސް އޭރުގެ ޕާޓީގެ ލީޑަރު ތަސްމީން ޢަލީއާއެކު އުފެދުނު ޚިލާފުތަކާ ގުޅިގެން އެމަނިކުފާނު ޕާޓީން ވަކިވެވަޑައިގަތެވެ. މައުމޫން ޑީ.އާރް.ޕީން ވަކިވެވަޑައިގަތުމާ ގުޅިގެން ޕާޓީގައި ބައިބައިވުން އުފެދި، އެމަނިކުފާނު އުފައްދަވައި، ޑީ.އާރް.ޕީގައި ތިއްބެވި މައުމޫނަށް ތާއީދުކުރައްވާ ބޭފުޅުން ބައިވެރިވި ޕްރޮގްރެސިވް ޕާޓީ އޮފް މޯލްޑިވްސް އުފެދުނެވެ.
މައުމޫން އެއްބަފާ ކޮއްކޯފުޅު، ކުރީގެ ރައީސް އަބްދުﷲ ޔާމީން އަބްދުލް ގައްޔޫމާއެކު އުފެދުނު ޚިލާފުތަކާ ގުޅިގެން ފަހުން ޕީ.ޕީ.އެމްއިން ވަކިކުރެވުނު މައުމޫން ވަނީ މޯލްޑިވްސް ރިފޯމް މޫވްމަންޓް (އެމް.އާރް.އެމް) އުފައްދަވާފައެވެ.
ޤާނޫނީ ގޮތުން ލާޒިމްކުރާ 3،000 މެމްބަރުން ހަމަނުވުމާ ގުޅިގެން އީ.ސީ އިން ވަނީ ޑީ.އާރް.ޕީ އުވާލާފައެވެ.
