މިފްކޯއިން އައު 140 ގްރާމުގެ މަސްދަޅު ކޭސްތައް ބާޒާރަށް ނެރުނު ނަމަވެސް، ކުރިއަށް އޮތް ރޯދަމަހު ސަރުކާރުން ގޭގެއަށް ހިލޭ ބަހާނީ 180 ގްރާމުގެ 48 ދަޅު މަސް ކޭސްތައް ކަމަށް އެ ކުންފުނިން މިއަދު ހާމަކޮށްފިއެވެ. އަދި މި ޕްލޭނަށް އެއްވެސް ބަދަލެއް ނުގެންނާނެ ކަމަށްވެސް އެ ކުންފުނިން ބުނެފައިވެއެވެ.
މިފްކޯއިން އިތުރަށް ހާމަކުރި ގޮތުގައި 140 ގްރާމުގެ މަސްދަޅު ކޭސްތަކަކީ މަދު މީހުން ދިރިއުޅޭ ގެތަކަށް އަމާޒުކޮށްގެން ނެރެފައިވާ އިކޮނޮމީ ޕެކް ކޭސްތަކެކެވެ. މި ކޭސްތައް އުފެއްދުމުގެ މަޤްޞަދަކީ އެއްފަހަރާ ބޭނުންކުރުމަށް ފަސޭހަ، އަދި ފްރިޖުކުރަން ނުޖެހޭ ގޮތަށް ބޭނުންކުރެވޭނެ ބާވަތެއްގެ ގޮތުގައި ވިއްކުމެވެ.
މިފްކޯއިން ވިއްކާ 48 ދަޅުގެ މަސް ކޭހެއްގެ އަގު 700 އާއި 800 ރުފިޔާއާ ދެމެދުގައި ހުރެއެވެ. މި އަގަށް ބަލާއިރު، 80,000 ގޭބީސީއަށް މަސްދަޅު ދޫކުރުމަށް ގާތްގަނޑަކަށް 56 މިލިއަން ރުފިޔާ ޚަރަދުވާނެ ކަމަށް ލަފާކުރެވެއެވެ. މި ސަބަބަށްޓަކައި، އާންމުކޮށް އުފައްދާ މިންވަރަށްވުރެ އިތުރު ލައްކައެއްހާ މަސްދަޅު މި ރޯދަމަހަށް އުފައްދަން ޖެހޭނެ ކަމަށް މިފްކޯއިން ފާހަގަކޮށްފައިވެއެވެ.
އަންނަ މަހުގެ ތެރޭގައި މަސްދަޅު އުފެއްދުމުގެ މަސައްކަތް ނިންމައި، ގޭގެއަށް ބެހުމުގެ މަސައްކަތް ފެށޭނެ ކަމަށް މިފްކޯއިން ބުނެފައިވެއެވެ. މި މަސައްކަތް ކުރިއަށް ގެންދާނެ ގޮތުގެ ޕްލޭން މިހާރު އެކުލަވާލަމުންދާ ކަމަށްވެސް އެ ކުންފުނިން ހާމަކޮށްފައިވެއެވެ.
މިދިޔަ އަހަރުގެ ނޮވެމްބަރު މަހު، ސަރުކާރަށް އެއް އަހަރު ފުރުން ފާހަގަކުރުމުގެ ރަސްމިއްޔާތުގައި ރައީސް ޑރ. މުޙައްމަދު މުޢިއްޒު ވިދާޅުވެފައިވަނީ މިއަހަރުގެ ރޯދަމަހު ކާޑުގެ ބަދަލުގައި ގޭގެއަށް މަސްދަޅު ކޭސް ދޫކުރާނެ ކަމަށެވެ. މިދިޔަ އަހަރުގެ ރޯދަމަހު ސަރުކާރުން ވަނީ 82,000 ގޭބީސީއަކަށް 1.6 މިލިއަން ކިލޯގެ ކާޑުގެ ބާވަތްތައް ހިލޭ ދީފައެވެ. މީގެއިތުރުން، ކަރަންޓާއި ފެނުގެ ބިލުން 142 މިލިއަން ރުފިޔާގެ ޑިސްކައުންޓްވެސް ދީފައިވެއެވެ.
