ސިޔާސީ ޕާޓީތަކަށް މެންބަރުން ވެއްދުމުގެ ނިޒާމް ހަރުދަނާކޮށް، ޑިޖިޓަލް ނިޒާމަކަށް ބަދަލުކުރުމުގެ މަސައްކަތް އިލެކްޝަންސް ކޮމިޝަން (އީސީ) އިން ފަށައިފިއެވެ. މި މަސައްކަތުގެ ތެރެއިން، މިހާރު ބޭނުންކުރަމުންދާ "ސިމެދަ" ޕޯޓަލް މެދުވެރިކޮށް ފޯމު ހުށަހެޅުން، 2025 ވަނަ އަހަރުގެ ޖެނުއަރީ މަހުގެ 30 ވަނަ ދުވަހުގެ ނިޔަލަށް ހުއްޓާލުމަށް އެ ކޮމިޝަނުން މިއަދު ވަނީ ނިންމާފައެވެ.
ނަމަވެސް، އިލެކްޝަންސް ކޮމިޝަނުން އިތުރަށް މަޢުލޫމާތު ދެއްވިގޮތުގައި، "މައި ޕޯޓަލް" މެދުވެރިކޮށް ޕާޓީން ވަކިވުމުގެ ޚިދުމަތް މެދުނުކެނޑި ކުރިއަށްދާނެއެވެ. މި ބަދަލު ގެނައުމަށް ނިންމާފައިވަނީ، ސިޔާސީ ޕާޓީތަކަށް މެންބަރުން ވަގަށް ވެއްދުމުގެ މައްސަލަ ދޭތެރެދޭތެރެއިން ފެންމަތިވެ، އާންމުންގެ ފަރާތުން މިކަމާ ގުޅިގެން ފާޅުކުރަމުންދާ ކަންބޮޑުވުންތަކަށް ހައްލެއް ހޯދުމުގެ ގޮތުންނެވެ.
