މީރާއިން ބުރާސްފަތި ދުވަހު ނެރުނު ބަޔާނެއްގައި ހާމަކޮށްފައިވާ ގޮތުގައި 2023 ވަނަ އަހަރުގެ ޑިސެމްބަރު މަހު އާމްދަނީގެ ގޮތުގައި 2.33 ބިލިއަން ރުފިޔާ ލިބިފައިވެއެވެ. މިއީ 2022 ވަނަ އަހަރުގެ މި މުއްދަތާ އަޅާބަލާއިރު 4.7 އިންސައްތައިގެ އިތުރުވުމެކެވެ. އަދި ޑިސެމްބަރު މަހު ލިބޭނެކަމަށް ލަފާކުރި އާމްދަނީއަށްވުރެ 20.1 އިންސައްތަ އިތުރު އަދަދެކެވެ.
މި އިތުރުވުމުގެ މައިގަނޑު ސަބަބުތަކުގެ ތެރޭގައި ޖީއެސްޓީ، ގްރީން ޓެކްސް އަދި ކޯޕަރޭޓް ސޯޝަލް ރެސްޕޮންސިބިލިޓީ ފީގެ ގޮތުގައި ލިބުނު އާމްދަނީ އިތުރުވުން ހިމެނެއެވެ. ޖުމުލަ އާމްދަނީގެ އެންމެ ބޮޑު ހިއްސާއެއް ކުރަނީ ޖީއެސްޓީއެވެ. އެގޮތުން ޖީއެސްޓީގެ ގޮތުގައި 1.33 ބިލިއަން ރުފިޔާ ލިބިފައިވާއިރު، މިއީ ޖުމުލަ އާމްދަނީގެ 57.34 އިންސައްތައެވެ. ގްރީން ޓެކުހުގެ ގޮތުގައި 109.46 މިލިއަން ރުފިޔާ ނުވަތަ ޖުމުލަ އާމްދަނީގެ 4.7 އިންސައްތަ ލިބިފައިވާއިރު، އާމްދަނީން ނަގާ ޓެކުހުގެ ގޮތުގައި 116.16 މިލިއަން ރުފިޔާ ނުވަތަ 5.0 އިންސައްތަ ލިބިފައިވެއެވެ.
ފާހަގަކޮށްލެވޭ އަނެއް ކަމަކީ މިދިޔަ މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ލަފާކުރި މިންވަރަށްވުރެ 5.7 އިންސައްތަ އިތުރުވެފައިވުމެވެ. މީގެ ސަބަބުން ފަތުރުވެރިކަމާ ގުޅުންހުރި އާމްދަނީވެސް އިތުރުވެފައިވެއެވެ. އެގޮތުން ޓޫރިޒަމް ލޭންޑް ރެންޓުގެ ގޮތުގައި 378.55 މިލިއަން ރުފިޔާ ނުވަތަ 16.25 އިންސައްތަ ލިބިފައިވެއެވެ. އެއަރޕޯޓް ޑިވެލޮޕްމަންޓް ފީގެ ގޮތުގައި 95.39 މިލިއަން ރުފިޔާ ނުވަތަ 4.1 އިންސައްތަ އަދި ޑިޕާޗަރ ޓެކުހުގެ ގޮތުގައި 93.93 މިލިއަން ރުފިޔާ ނުވަތަ 4.0 އިންސައްތަ ލިބިފައިވެއެވެ.
މީރާގެ ބަޔާނުގައި އިތުރަށް ފާހަގަކޮށްފައިވާ ގޮތުގައި ޑިސެމްބަރު މަހުގެ އާމްދަނީގެ ތެރޭގައި 112.75 މިލިއަން އެމެރިކާ ޑޮލަރު ހިމެނެއެވެ.
