މީރާއިން ހާމަކުރި ގޮތުގައި 2024 ވަނަ އަހަރުގެ ޑިސެންބަރު މަހު އެ އިދާރާއަށް 2.33 ބިލިޔަން ރުފިޔާގެ އާމްދަނީ ބަލައިގަނެފައިވެއެވެ. މިއީ 2023 ވަނަ އަހަރުގެ މި މުއްދަތާ އަޅާބަލާއިރު 4.7 އިންސައްތަ އިތުރު އަދަދެކެވެ. އަދި 2024 ވަނަ އަހަރުގެ ޑިސެންބަރު މަހު ލިބޭނެކަމަށް އަންދާޒާކޮށްފައިވާ އަދަދަށްވުރެ 20.1 އިންސައްތަ އިތުރު އަދަދެކެވެ.
މި އިތުރުވުމުގެ މައިގަނޑު ސަބަބުތަކުގެ ތެރޭގައި ޖީއެސްޓީ، ގްރީން ޓެކްސް އަދި ކޯޕަރޭޓް ސޯޝަލް ރެސްޕޮންސިބިލިޓީގެ ފީގެ ގޮތުގައި ލިބުނު އާމްދަނީ އިތުރުވުން ހިމެނެއެވެ. އަދި ހަމައެހެންމެ، ޑިސެންބަރު 2024 ގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު އަންދާޒާކުރި މިންވަރަށްވުރެ 5.7 އިންސައްތަ އިތުރުވެ، ފަތުރުވެރިކަމާ ގުޅުންހުރި ދާއިރާތަކުން ލިބުނު އާމްދަނީވެސް އިތުރުވެފައިވެއެވެ.
މީރާގެ އެންފޯސްމަންޓް ފިޔަވަޅުތަކުގެ ދަށުން ހޯދާފައިވާ އާމްދަނީ، ޑިސެންބަރު މަހު ލިބުނު ޖުމްލަ އާމްދަނީގެ 17.5 އިންސައްތަ ހިއްސާކުރެއެވެ. އަދި އެންމެ ގިނަ އާމްދަނީއެއް ލިބިފައިވަނީ ޖީއެސްޓީގެ ގޮތުގައި 1.33 ބިލިޔަން ރުފިޔާއެވެ. މިއީ ޖުމްލަ އާމްދަނީގެ 57.34 އިންސައްތައެވެ. ދެވަނައަށް އެންމެ ގިނަ އާމްދަނީއެއް ލިބިފައިވަނީ ޓޫރިޒަމް ލޭންޑް ރެންޓްގެ ގޮތުގައި 378.55 މިލިޔަން ރުފިޔާއެވެ.
މީގެ އިތުރުން، އާމްދަނީން ނަގާ ޓެކުހުގެ ގޮތުގައި 116.16 މިލިޔަން ރުފިޔާ، ގްރީން ޓެކުހުގެ ގޮތުގައި 109.46 މިލިޔަން ރުފިޔާ، އެއަރޕޯޓް ޑިވެލޮޕްމަންޓް ފީގެ ގޮތުގައި 95.39 މިލިޔަން ރުފިޔާ، އަދި ޑިޕާޗަރ ޓެކުހުގެ ގޮތުގައި 93.93 މިލިޔަން ރުފިޔާ ލިބިފައިވެއެވެ. ޑިސެންބަރު 2024 ގައި ބަލައިގަނެފައިވާ ޖުމްލަ އާމްދަނީގެ ތެރޭގައި 112.75 މިލިޔަން އެމެރިކާ ޑޮލަރު ހިމެނެއެވެ.
