ކޮންމެ އަހަރެއްގެ ރަމަޟާން މަހާ ދިމާކޮށް ސައުދީ އަރަބިއްޔާއިން ދިވެހިރާއްޖެއަށް ހަދިޔާކުރާ ކަދުރު މިއަހަރުވެސް ރާއްޖެއަށް ލިބިއްޖެއެވެ.
މިއަހަރު ސައުދީ ސަރުކާރުން 50 ޓަނުގެ ކަދުރު ރާއްޖެއަށް ހަދިޔާކޮށްފައިވާއިރު، މިނިސްޓަރު ޝަހީމް ވިދާޅުވެފައިވަނީ މިހާރު މިނިސްޓްރީއަށް އެ ކަދުރު ލިބިފައިވާ ކަމަށެވެ. އަދި ރަމަޟާން މަސް ފެށުމުގެ ކުރިން ކަދުރު ބެހުމުގެ މަސައްކަތް ނިންމާލެވޭނެ ކަމަށް އެމަނިކުފާނު ވިދާޅުވިއެވެ.
މިއަހަރުގެ ކަދުރު ބެހުމުގައި އައު ކަމެއްގެ ގޮތުން، މިސްކިތްތަކުގައި ރޯދަވީއްލުމުގެ ޕްރޮގްރާމްތައް ހިންގަން ބޭނުންވާ ޖަމިއްޔާތަކަށްވެސް ކަދުރުން ބައެއް ދޫކުރެވޭނެ ކަމަށް މިނިސްޓަރު ހާމަކުރެއްވިއެވެ.
ފާއިތުވި އަހަރުތަކެކޭ އެއްފަދައިން މިއަހަރުވެސް ސައުދީ ސަރުކާރުން ރާއްޖެއަށް ކަދުރު ހަދިޔާކުރުމަކީ ދެ ގައުމުގެ ދެމެދުގައި އޮތް ގާތް ގުޅުމުގެ ރަމްޒެއް ކަމުގައި ބެލެވެއެވެ.
