އއ. އުކުޅަހު މެޖިސްޓްރޭޓް ކޯޓުގެ އިސް މެޖިސްޓްރޭޓް އަހުމަދު މުއާވިޔަތު ގާސިމްގެ މައްޗަށް އޮތް ސާބިތު ދަރަންޏެއް ނުދެއްކުމުގެ ސަބަބުން އޭނާގެ ފަނޑިޔާރުކަމުގެ މަގާމު ގެއްލިއްޖެއެވެ.
މި މައްސަލައަކީ މުއާވިޔަތަށް ބޭންކުން ދޫކޮށްފައިވާ ކްރެޑިޓް ކާޑަށް ނުދައްކާ އޮތް ތިން ލައްކައަށް ވުރެ ގިނަ ރުފިޔާއާ ގުޅޭ މައްސަލައެކެވެ. މިދިޔަ އަހަރު ސިވިލް ކޯޓުން ކުރި ހުކުމުގައި މި ފައިސާ އެއް އަހަރު ތެރޭގައި ދެއްކުމަށް އަންގާފައިވެއެވެ. ނަމަވެސް، ފައިސާ ނުދެއްކުމުން މިއަހަރު ބޭންކުން އަލުން ސިވިލް ކޯޓަށް މައްސަލަ ހުށަހެޅިއެވެ. އޭގެ ފަހުން މިދިޔަ އޮކްޓޫބަރު މަހު، ބޭންކާއެކު އެއްބަސްވުމަކަށް އާދެވުމާ ގުޅިގެން ފައިސާ ދެއްކުމަށް އިތުރު ފުރުސަތެއް ދިނުމަށް ސިވިލް ކޯޓުން ނިންމިއެވެ.
ޖުޑީޝަލް ސަރވިސް ކޮމިޝަން (ޖޭއެސްސީ) އިން ހާމަކުރި ގޮތުގައި، މި ސާބިތު ދަރަނީގެ މައްސަލައިގައި ހުކުމާ އެއްގޮތަށް ފައިސާ ނުދައްކާ ކަމަށް މުއާވިޔަތު ވަނީ ޖޭއެސްސީގެ ތަހުގީގު ކޮމެޓީގައި އިއުތިރާފުވެފައެވެ. ގާނޫނުއަސާސީގެ ދަށުން ފަނޑިޔާރުންގެ ކިބައިގައި ހުރުން ލާޒިމް ޝަރުތުތަކުގެ ތެރޭގައި ސާބިތު ދަރަންޏެއް އޮތްނަމަ އެ ދަރަނި ހުކުމާ އެއްގޮތަށް ދެއްކުން ހިމެނެއެވެ. މި ޝަރުތު މުއާވިޔަތުގެ ކިބައިން އުނިވެފައިވާތީ، އިއްޔެ ޖޭއެސްސީން ވަނީ އުކުޅަހު މެޖިސްޓްރޭޓް ކޯޓުގެ އިސް މެޖިސްޓްރޭޓްގެ މަގާމު ހުސްވެއްޖެކަމަށް ނިންމާފައެވެ.
