ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން 9 ކުންފުންޏަކަށް ބަދަލުގެ ގޮތުގައި ދޭން އެއްބަސްވެފައިވާ އެއްބަސްވުންތަކާއި ގުޅިގެން ޖިނާއީ ތަހުގީގެއް ހިންގުމަށް ޕީޖީން އޭސީސީގައި އެދިއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީން، 2018 ނޮވެންބަރު 17 އިން 2023 ނޮވެންބަރު 17 އާ ދެމެދު ދައުލަތުން އެކި ފަރާތްތަކަށް ބަދަލުގެ ގޮތުގައި ދީފައިވާ ފައިސާގެ މައްސަލަ ދިރާސާކޮށް، އެ ކޮމިޓީއަށް ފާހަގަކުރެވުނު ކަންކަމުގެ ރިޕޯޓެއް ޕްރޮސިކިއުޓަރ ޖެނެރަލްގެ އޮފީހަށް ހުށަހަޅާފައިވާކަމަށް އެ އޮފީހުން މިއަދު ހާމަކުރިއެވެ.
ޕްރޮސިކިއުޓަރ ޖެނެރަލްގެ އޮފީހުން ބުނާ ގޮތުގައި، އެ ރިޕޯޓުގައި ދައުލަތުގެ އިސް މަގާމުތަކުގައި ތިބި ބައެއް ފަރާތްތަކުން، ދައުލަތުގެ ފައިސާއާއި މުދާ އޭގެ ހައްގުވެރިން ނޫން އެހެން ފަރާތްތަކަށް ލިއްބައިދީ އަދި ލިއްބައިދިނުމަށް މަސައްކަތްކޮށްފައިވާކަމުގެ ތުހުމަތުތަކެއް ފާހަގަކޮށްފައިވެއެވެ. މީގެ އިތުރުން، ދައުލަތުގެ މުވައްޒަފުންތަކެއް ރަސްމީ ވާޖިބުތަކާ ހިލާފަށް އަދި ދައުލަތަށް ގެއްލުންވާ ގޮތަށް އަމަލުކޮށްފައިވާ ކަމަށް ތުހުމަތުކުރެވޭ ކަންތައްތަކެއްވެސް ރިޕޯޓުގައި ހިމެނިފައިވެއެވެ.
މި ކަންކަމަށް ރިއާޔަތްކުރުމަށްފަހު، މިއީ އެންޓި-ކޮރަޕްޝަން ކޮމިޝަނަށް ތަހުގީގު ކުރުމުގެ ބާރު ލިބިފައިވާ މައްސަލަތަކެއް ކަމަށް ޕްރޮސިކިއުޓަރ ޖެނެރަލްގެ އޮފީހަށް ފެންނާތީ، މި މަހުގެ 17 ވަނަ ދުވަހު އެ ކޮމިޝަނަށް ވަނީ އަންގާފައެވެ. އަދި މި މައްސަލައިގެ އަވަސް ތަހުގީގެއް ހިންގުމަށާއި، ތަހުގީގަށް ކުރިއެރުން ލިބެމުންދާ ވަރަކުން އެ އޮފީހާ މަޝްވަރާކުރަމުން ގެންދިއުމަށްވެސް އެ ކޮމިޝަނުގައި އެދިފައިވެއެވެ.
މި މައްސަލައާ ގުޅިގެން، މިދިޔަ ބުރާސްފަތި ދުވަހު ބަންޑާރަ ނާއިބު ވަނީ، ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން 9 ކުންފުންޏަކަށް ބަދަލުގެ ގޮތުގައި ދޭން އެއްބަސްވެފައިވާ އެއްބަސްވުންތަކަށް އަމަލު ކުރަން ނުޖެހޭނެ ކަމަށް ނިންމައި، އެކަން ކަމާބެހޭ އިދާރާތަކަށް އަންގާފައެވެ.
