ދިވެހިންނަކީ ދުންފަތުގެ ބާވަތްތަކުން ސަލާމަތްވެފައިވާ ބަޔަކަށް ހެދުމަށް ގިނަ މަސައްކަތްތަކެއް ކުރަމުންދާ ކަމަށް ހެލްތު މިނިސްޓަރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ.
މިނިސްޓަރު މިހެން ވިދާޅުވެފައިވަނީ މަސްތުވާތަކެތީގެ ބާވަތްތަކުން ރައްކާތެރިވުމާއި ދުންފަތް ކޮންޓްރޯލްކުރުމާބެހޭ ޤާނޫނަށް ގެނައި އިސްލާޙުތަކާ ބެހޭގޮތުން ކުރިއަށްގެންދިޔަ ރައުންޑް ޓޭބަލް ބައްދަލުވުމުގެ ރަސްމިއްޔާތުގައެވެ.
މި ރަސްމިއްޔާތުގައި މިނިސްޓަރު ފާހަގަކުރެއްވި ގޮތުގައި ދިވެހި މުޖުތަމައަކީ ދުޅަހެޔޮ ބަޔަކު ދިރިއުޅޭ ތަނަކަށް ހެދުމަށް، މީގެ ކުރިން ވެރިންނަށް ކެރިވަޑައިނުގަތް ގިނަ ފިޔަވަޅުތަކެއް ރައީސް އަޅުއްވާފައިވެއެވެ. އެގޮތުން ރައީސްގެ އިރުޝާދުގެ ދަށުން ދުންފަތް ކޮންޓްރޯލްކުރުމުގެ ޤައުމީ ދުރުރާސްތާ ޕްލޭން އެކުލަވާލުމުގެ މަސައްކަތް ހެލްތު މިނިސްޓްރީން ކުރިއަށް ގެންދާ ކަމަށާއި، މި ޕްލޭންގެ ކަރުދާހީ މަސައްކަތްތައް އަންނަ އަހަރުގެ ކުރީކޮޅު ނިންމައި، އޭގެ ފަހުން އަމަލީ މަސައްކަތް ފެށޭނެ ކަމަށް މިނިސްޓަރު ވިދާޅުވިއެވެ.
މީގެއިތުރުން، މުޅި ރާއްޖޭގައި ސިޒޭޝަން ކްލިނިކްތަކެއް ގާއިމުކުރުމުގެ މަސައްކަތާއި، އެ ކްލިނިކްތަކަށް ބޭނުންވާ މުވައްޒަފުން ތަމްރީނުކުރުމުގެ މަސައްކަތްވެސް ކުރިއަށްދާކަން މިނިސްޓަރު ފާހަގަކުރެއްވިއެވެ. އަދި ދުންފަތާމެދު ހޭލުންތެރިކުރުވުމާއި، ޤާނޫނު ތަންފީޒުކުރުމާއި، ދެވިހިފާފައިވާ މީހުންނަށް އެހީތެރިކަން ފޯރުކޮށްދިނުމަކީ މުހިންމު ކަމެއްކަމާއި، މިކަމުގައި ކޮންމެ ދިވެހި ރައްޔިތެއްގެވެސް އެއްބާރުލުން ބޭނުންވާކަން ފާހަގަކުރެއްވިއެވެ.
މި ބައްދަލުވުމަކީ ހެލްތު ޕްރޮޓެކްޝަން އެޖެންސީއާއި ޔުނިސެފް ގުޅިގެން ބޭއްވި ބައްދަލުވުމެއް ކަމަށާއި، މި ބައްދަލުވުމުގައި ދުންފަތުގެ ނުރައްކަލުން ޚާއްސަކޮށް ކުޑަކުދިންނާއި ޒުވާނުން ސަލާމަތްކުރުމަށް މުހިންމު މަޝްވަރާތަކެއް ކުރިއަށް ގެންދާނެއެވެ.
