ހޯމް މިނިސްޓްރީން ހާމަކުރި ގޮތުގައި، ބިދޭސީންގެ މަޢުލޫމާތު އެއްކުރުމަށް ކުރިއަށްގެންދާ އޮޕަރޭޝަން ކުރަނގީގައި މިހާތަނަށް 18,919 ބިދޭސީންގެ ބަޔޯމެޓްރިކް ޑޭޓާ އެއްކޮށްފިއެވެ.
ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތުގެ ފުރަތަމަ މަރުހަލާގެ ދަށުން މި އޮޕަރޭޝަން ފެށިފައިވަނީ 2024 މެއި 2 ވަނަ ދުވަހުއެވެ. މިހާތަނަށް 194 ރަށެއްގައި މަސައްކަތް ފަށައި، އޭގެ ތެރެއިން 50 ރަށެއްގައި މަސައްކަތް ވަނީ ނިމިފައެވެ.
ސަރުކާރަށް އެއް އަހަރު ފުރުމާ ގުޅިގެން ދައުލަތުގެ މީޑިއާއަށް މަޢުލޫމާތު ދެމުން ހޯމްލޭންޑް މިނިސްޓަރު އަލީ އިހުސާން ވިދާޅުވެފައިވަނީ މި މަސައްކަތް 2025 އެޕްރީލް މަހުގެ ނިޔަލަށް ނިންމުމަށް މަސައްކަތްކުރަމުންދާ ކަމަށެވެ. އަދި ގަވާއިދާ ޚިލާފަށް ރާއްޖޭގައި ވިޔަފާރިކުރަމުންދިޔަ 5,000 އެއްހާ ބިދޭސީން މިހާރު ވަނީ ރާއްޖެއިން ފުރުވާލެވިފައެވެ. މިކަމަކީ މި ދާއިރާއިން ރަނގަޅު މިސްރާބަކަށް ކުރެވެމުންދާ މަސައްކަތްތަކުގެ ހެއްކެއް ކަމުގައި މިނިސްޓަރު ފާހަގަކުރެއްވިއެވެ.
މިނިސްޓަރު އިހުސާން ކުރިން ވިދާޅުވެފައިވާ ގޮތުގައި، ބިދޭސީންގެ ފިންގަރޕްރިންޓާއި ފޮޓޯ ނަގައި، ގަވާއިދަށް ފެއްތުމުގެ މަސައްކަތް ނިމޭއިރު، މަޢުލޫމާތު ކަށަވަރު ނުވާ އެއްވެސް ބިދޭސީއަކު ރާއްޖޭގައި ނުހުންނާނެއެވެ. މި އޮޕަރޭޝަނަކީ ތިން އަހަރަށް އަމާޒުކޮށްގެން ކުރިއަށްގެންދާ މަސައްކަތެއް ކަމަށާއި، އޭގެ ނަތީޖާއެއްގެ ގޮތުން ރާއްޖޭގައި ތިބޭނީ 100 ޕަސެންޓް ވެރިފައި ކުރެވިފައިވާ ބިދޭސީން އެކަންޏެވެ.
އޮޕަރޭޝަންގެ ފުރަތަމަ މަރުހަލާ ނިމުމުން، ރަސްމީ ލިޔެކިޔުން ނެތި ގަވާއިދާ ޚިލާފަށް އުޅޭ ބިދޭސީންގެ ބަޔޯމެޓްރިކް އައިޑެންޓިފިކޭޝަން ހަދައި، އެމްބަސީތަކާ ގުޅިގެން އެ މީހުން އަނބުރާ އެމީހުންގެ ޤައުމަށް ފޮނުވާލެވޭނެއެވެ. މި މަސައްކަތަކީ ހޯމް މިނިސްޓްރީ، ދިވެހި ފުލުހުންގެ ޚިދުމަތް، އަދި މޯލްޑިވްސް އިމިގްރޭޝަން ގުޅިގެން ކުރިއަށްގެންދާ މަސައްކަތެކެވެ.
