ދައުލަތުގެ އާމްދަނީ އިތުރުވެފައިވީ ނަމަވެސް ރައްޔިތުންގެ ހާލަތު ދަށަށް ގޮސްފައިވާ ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ. އެކްސްގައި ކުރެއްވި ޕޯސްޓެއްގައި އޭނާ ފާހަގަކުރެއްވި ގޮތުގައި، އަހަރު ނިމިގެންދާއިރު ސަރުކާރުގެ މާލީ ހިސާބުތަކުން ދިވެހި ރައްޔިތުންނަށް އެއްވެސް ހިތްހަމަޖެހުމެއް ލިބިފައެއް ނުވެއެވެ.
ޝާހިދު ވިދާޅުވި ގޮތުގައި މިހާރު ދިވެހިން ދިރިއުޅެމުންދަނީ ނުތަނަވަސްކަމާއި ކަންބޮޑުވުންތަކުގެ ތެރޭގައެވެ. އަދި މި ސަރުކާރުން ވަނީ ރައްޔިތުން އަޅުވެތިކަމުގެ ބަނދެލުމެއްގައި ބަނދެލުމަށް މަސައްކަތްކުރަމުންނެވެ. ދައުލަތަށް ލިބުނު އާމްދަނީ 78 ބިލިއަން ރުފިޔާއިން އިތުރުވެފައިވީ ނަމަވެސް، ރައްޔިތުންގެ ދިރިއުޅުމުގެ ހާލަތު ވަނީ އިތުރަށް ދަށަށް ގޮސްފައެވެ.
އޭގެ އިތުރުން، ސަރުކާރުން އާސަންދައަށް ކުރާ ހޭދަ 101 މިލިއަން ރުފިޔާއިން ކުޑަކޮށްފައިވާއިރު، ސިޔާސީ މުސާރަތަކާ ގުޅުންހުރި ޚަރަދުތައް 1.4 ބިލިއަން ރުފިޔާއިން އިތުރުކޮށްފައިވާ ކަމަށް ޝާހިދު ފާހަގަކުރެއްވިއެވެ. މިހާރު އިވެމުންދަނީ ނިކަމެތި ރައްޔިތުން އާސަންދައަށް އެދި ރޮއި އާދޭސްކުރާ ހިތްދަތި އަޑުތަކެވެ.
ޝާހިދު އިތުރަށް ފާހަގަކުރެއްވި ގޮތުގައި، ސަރުކާރުގެ އިސްވެރިން ވަނީ އާންމު ރައްޔިތުންގެ ވޭނަށް އިޖާބަ ނުދީ، އަމިއްލަ މަންފާއަށް ބޭކާރު ޚަރަދުތައް ކުރަމުންނެވެ.
