ޕީޕީއެމް އުވާލުމަށް ނިންމި ނަމަވެސް އެ ޕާޓީގެ މެންބަރުން ޕީޕްލްސް ނެޝަނަލް ކޮންގްރެސް (ޕީއެންސީ)އާއެކު އެއް ފިކުރެއްގައި ދެމިތިބޭނެ ކަމަށް ފިޝަރީޒް މިނިސްޓަރު އަދި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ނާއިބު ރައީސް އަޙްމަދު ޝިޔާމް ވިދާޅުވެއްޖެއެވެ.
މިއަދު ބޭއްވުނު ޕީޕީއެމްގެ ސެނެޓުގެ ބައްދަލުވުމެއްގައި ޕާޓީ އުވާލުމަށް ނިންމުމަށްފަހު، ނޫސްވެރިންނަށް މަޢުލޫމާތު ދެމުން ޝިޔާމް ވިދާޅުވެފައިވަނީ ޕީޕީއެމްއާއި ޕީއެންސީއަކީ އެއް ފުރާޅެއްގެ ދަށުން ހިންގަމުން އައި އެއް ފިކުރެއްގެ ދެ ޕާޓީއެއް ކަމަށެވެ. އިތުރަށް ވިދާޅުވެފައިވަނީ އޭރުގެ ސިޔާސީ މަޝްރަހު އޮތް ގޮތުން ޕީޕީއެމްއަށް ވެރިކަމަށް އައުމަށް ހުރަސްތަކެއް ކުރިމަތިވެދާނެކަމަށް ބެލެވުމުން ޕީއެންސީ އުފެއްދި ކަމަށާއި، މިކަމުގެ ސަބަބުން ދިވެހި ރައްޔިތުން ބޭނުންވި ގޮތަށް އެ ފިކުރުގެ ވެރިކަމެއް އުފެދުމަށް މަގުފަހިވެގެން ދިޔަ ކަމަށެވެ.
ޝިޔާމް އިތުރަށް ފާހަގަކުރެއްވި ގޮތުގައި ޕީއެންސީގެ ފިކުރަކީ އިސްލާމްދީން ހިމާޔަތްކޮށް ޤައުމިއްޔަތު ދެމެހެއްޓުމަށް އިސްކަންދޭ ފިކުރެއް ކަމަށާއި، ދެ ޕާޓީގައިވެސް އޮތީ މި ފިކުރު ކަމަށްވާއިރު، މިއަދު ކުރެވިގެން ދިޔައީ ފިކުރު 'އެލައިން' ކުރުމުގެ މަސައްކަތެއް ކަމަށެވެ.
ފާހަގަކޮށްލެވޭ ގޮތުގައި ޕީޕީއެމްއަކީ ދިވެހިރައްޔިތުންގެ ޕާޓީ (ޑީއާރުޕީ)ގެ ތެރޭގައި އުފެދުނު ޚިޔާލު ތަފާތުވުންތަކާ ގުޅިގެން، ކުރީގެ ރައީސް މައުމޫން ޢަބްދުލްޤައްޔޫމާއި އެމަނިކުފާނުގެ ތާއީދުކުރާ ފަރާތްތައް ޑީއާރުޕީން ވަކިވެގެން އުފެއްދި ޕާޓީއެކެވެ. މިއަދު ޕީޕީއެމް އުވާލުމަށް ނިންމާފައިވާއިރު، މި ނިންމުމާމެދު ކުރީގެ ރައީސް ޔާމީން ޢަބްދުލްޤައްޔޫމް ވަނީ ނުރުހުން ފާޅުކުރައްވައި އެކަން ކުށްވެރިކުރައްވާފައެވެ.
