ނޭޝަނަލް ބިއުރޯ އޮފް ސްޓެޓިސްޓިކްސް (އެންބީއެސް) އިން އާންމުކުރި މަޢުލޫމާތުން ދައްކާގޮތުގައި، ރާއްޖޭގެ މުދަލާއި ޚިދުމަތުގެ އަގުތައް އޮކްޓޫބަރު މަހު ސެޕްޓެމްބަރު މަހާ އަޅާބަލާއިރު 0.16 ޕަސެންޓް ދަށަށް ގޮސްފައިވާކަމަށް ދައްކައިފިއެވެ. މީގެ އިތުރުން، މަހުގެ އަގުތަކަށް އައި ބަދަލު ނުހިމަނާ ބަލާއިރު، އިންފްލޭޝަން ރޭޓް ވަނީ 0.24 ޕަސެންޓަށް ދަށްވެފައެވެ.
އޮކްޓޫބަރު މަހު އެންމެ ފާހަގަކޮށްލެވޭ ދަށްވުމެއް އައިސްފައިވަނީ ޕެޓްސް އަދި ޕެޓް ޕްރޮޑަކްޓްސްގެ އަގުތަކަށެވެ. މި ބައިން 6.26 ޕަސެންޓް ދަށްވެފައިވާއިރު، ތަރުކާރީގެ އަގުތައް 3.91 ޕަސެންޓް، ފޮތުގެ އަގުތައް 3.83 ޕަސެންޓް، އަދި ކަރަންޓުގެ އަގުތައް 2.64 ޕަސެންޓް ދަށްވެފައިވެއެވެ. މޯބައިލް ފޯނުތަކުގެ އަގުތައް 1.68 ޕަސެންޓް އަދި މޭވާގެ އަގުތައް 1.0 ޕަސެންޓް ދަށްވެފައިވެއެވެ.
އެހެންނަމަވެސް، ބައެއް މުދަލާއި ޚިދުމަތުގެ އަގުތައް ވަނީ މައްޗަށް ގޮސްފައެވެ. މީގެ ތެރޭގައި މޯބައިލް މުވާޞަލާތީ ޚިދުމަތުގެ އަގުތައް 2.88 ޕަސެންޓް އަދި ކަނޑުމަހުގެ އަގުތައް 1.37 ޕަސެންޓް އިތުރުވެފައިވާކަން ކޮންސިއުމަރ ޕްރައިސް އިންޑެކްސް (ސީޕީއައި) އިން ދައްކައެވެ.
