ގދ. ތިނަދޫ އަށް ސިޓީއެއްގެ ދަރަޖަ ދިނުމާ ގުޅިގެން އެ ނިންމުން ބާތިލް ކުރަން ހައި ކޯޓަށް މައްސަލަ ހުށަހެޅުއްވި އެންވަޔަރަމަންޓް މިނިސްޓްރީގެ ޑެޕިއުޓީ މިނިސްޓަރު މުހައްމަދު ރާގިބު މަގާމުން ވަކިކޮށްފިއެވެ.
ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެން، ޑެޕިއުޓީ މިނިސްޓަރު މުހައްމަދު ރާގިބު މަގާމުން ވަކިކުރަން ރައީސް ޑރ. މުހައްމަދު މުއިއްޒު މިއަދު ނިންމަވާފައިވާ ކަމަށެވެ.
ތިނަދޫއަށް ސިޓީއެއްގެ ދަރަޖަ ދީފައިވަނީ ކުރީގެ ރައީސް އިބްރާހިމް މުހައްމަދު ސޯލިހު ރިޔާސީ ކެމްޕެއިންގައެވެ. އޭރުގައި ތިނަދޫގެ އާބާދީގައި 8،000 މީހުން ހިމެނުނަސް، ރަށުގައި ދިރިއުޅެމުން އައީ 5،000 މީހުންނެވެ.
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުން ސިޓީއެއްގެ ދަރަޖަ ދިނުމުގައި ބަލާ މިންގަނޑުގެ ތެރޭގައި ރަށެއްގެ އާބާދީ 10،000 އަށް ވުރެ ދަށް ނުވުން ހިމެނެއެވެ.
ރާގިބު ވިދާޅުވި ގޮތުގައި އާބާދީގައި 10،000 ހަމަވާ ކަމަށް ބުނެ ތިނަދޫ ކައުންސިލުން ގެންގުޅެފައިވަނީ އޮޅުވާލާފައިވާ ލިސްޓެކެވެ. އެ ލިސްޓު ދިރާސާ ކުރިއިރު، މަރުވެފައިވާ މީހުންނާއި އައިޑީކާޑް ނަންބަރު ބަދަލުކޮށްލާފައި އެއް ނަމެއްގައި ހިމެނޭ މީހުން ވެސް ލިސްޓުގައި އެބަތިބި ކަމަށެވެ.
އެހެންވެ، މިއީ ޣައިރު ގާނޫނީ ލިސްޓެއް ކަމަށް އޭނާ ވިދާޅުވިއެވެ.
މިދިޔަ ބުރާސްފަތި ދުވަހު ހުށަހެޅި މައްސަލަ ބަލައިގަތުމާ މެދު ހައި ކޯޓުން އަދި ގޮތެއް ނުނިންމައެވެ.
