ތިން އަހަރުގެ ތެރޭގައި އިތުރު ހަ މީހަކަށް އެއިޑްސް ޖެހިފައިވާކަން އެޗްޕީއޭ އިން ހާމަކޮށްފިއެވެ. އޭގެތެރޭގައި 2021 ގައި ދެ ފިރިހެނަކަށާއި، 2022 ގައި އެކަކަށް، އަދި 2023 ގައި ދެ ފިރިހެނަކާއި އަންހެނަކަށް އެއިޑްސް ޖެހުނެވެ.
އެޗްޕީއޭގެ ތަފާސް ހިސާބުތަކުން ދައްކާގޮތުގައި މިހާތަނަށް ރާއްޖޭގައި 32 އަހަރުގެ ތެރޭގައި 43 މީހަކަށް އެއިޑްސް ޖެހިފައިވެއެވެ. މީގެ ތެރެއިން 16 މީހަކު ވަނީ މަރުވެފައެވެ. އަދި މިވަގުތު 26 މީހަކު މިބަލީގައި އުޅެމުންދެއެވެ.
އެންމެ ފަހުން އެއިޑްސް އެންމެ ގިނައިން ރިޕޯޓުކުރެވުނީ 2019 ވަނަ އަހަރުއެވެ. އެއަހަރު ފަސް ފިރިހެނުންނާއި ދެ އަންހެނަކަށް މިބަލި ޖެހުނެވެ. ބަލި ޖެހިފައިވާ މީހުންގެ ތެރޭގައި އެންމެ ގިނައީ 15-24 އަހަރާ ދެމެދުގެ 10 މީހުންނެވެ. އަދި 25-34 އަހަރާ ދެމެދުގެ 6 މީހުންވެސް މިބަލީގައި ހިމެނެއެވެ.
ހެލްތު މިނިސްޓްރީން އެއިޑްސްއިން ރައްކާތެރިވުމަށް އިރުޝާދު ދެމުންދެއެވެ. އެގޮތުން އެޗްއައިވީ ނެތް ބައިވެރިއަކާއެކު ޖިންސީ ގުޅުން ހިންގުމަކީ އެޗްއައިވީ ޖެހުމުގެ ފުރުސަތު ކުޑަކުރެވޭނެ ކަމެކެވެ. އަދި އެހެން މީހަކު ބޭނުންކޮށްފައިވާ ސިރިންޖު އަދި ކަށި ފަދަ ތަކެތި ބޭނުން ނުކުރުމަށް އިރުޝާދު ދެއެވެ. މީގެއިތުރުން މާބަނޑު ދުވަސްވަރު ދުރާލާ އެޗްއައިވީ ޓެސްޓު ހެދުމަށާއި، ޕޮޒިޓިވް ވެއްޖެނަމަ ކަނޑައެޅިފައިވާ ފަރުވާ ފުރިހަމަކުރުމަށް އިރުޝާދު ދެއެވެ. މިގޮތަށް ފަރުވާ ހޯދުމުން ދަރިފުޅަށް އެޗްއައިވީ ޖެހުމުން ރައްކާތެރިކުރެވޭނެއެވެ.
